DILI – Prezidente Federasaun Futebol Timor-Leste (FFTL) Francisco Jerónimo, informa, tinan ne’e sei realiza Liga Timorense ba Primeira Divizaun no Segunda Divizaun maibé tenke tuir regras ka orariu ne’ebé Federation International Football Asosiation (FIFA sigla ingles) no Asia Football Confederation (AFC sigla ingles) nian.
“Liga Timorense tinan ne’e ita realiza maibé ita tenke ajusta ho orariu foun husi FIFA no AFC nian ne’ebé ami tenki hala’o tuir se lae federasaun bele hetan sansaun“, prezidente FFTL Francisco Jerónimo ba jornalista sira iha Farol, Díli kuarta (27/04).
Jerónimo hatete, jogu ne’e laos ona hanesan uluk uluk ne’ebé hahú iha fulan marsu ka abril maibé liga tenke hala’o iha fulan agostu
Prezidente FFTL ne’e esplika, FIFA hasai ona orariu foun ne’ebe nasaun hotu tenke adapta ho ida ne’e katak liga hotu hala’o iha fulan agostu no remata iha fulan junu tinan tuir mai tan ne’e sira husu ba orgaun liga katak labele ansi lai hein fulan agostu mak hala’o liga Timorense epoka 2022.
Nia dehan, komunikasaun entre FFTL ho LFTL di’ak hela no sira preparadu hela atu hala’o Liga ohin ka aban mós federasaun prontu maibé sira tenke kumpri orariu no regra FIFA no AFC nian se lae federasaun sei hetan xamada no ikus mai bele hetan sansaun husi FIFA no AFC nian ne’ebé Liga Timorense epoka ne’e hala’o iha fulan agostu no sei remata fulan junu tinan oin.
Enteretantu Klube ne’ebe sei kompete iha divizaun dahuluk Liga Timorense epoka ne’e hamutuk sanulu mak Karketu Dili FC, Lalenok United FC, AS Ponta Leste, AD SLB Laulara, Assalam FC, Aitana FC, Emmanuel FC, Academica FC, Porto Taibesi FC no Atlético Ultramar
Enkuantu iha Segunda divizaun sei kompete husi klubu 8 mak hanesan AS Marca, Zebra FC, Fitun Estudante FC, Santa Cruz FC, Nagarjo FC, Lica Lica Lemorai FC, Kablaki FC no DIT FC.
ADS
