DILI- Federasaun Futebol Timor-Leste (FFTL) liu diresaun kompetisaun, rejistu ona klube 5 hodi kompete iha terseiru divizaun Liga Futebool Femenino epoka 2022.
Federasaun Futebool Timor-Leste hahú loke rejistrasaun ba klubu foun sira ne’ebé atu kompete iha terseiru divizaun desde loron 21 fulan abril tinan ne’e, no to’o ohin loron FTTL liu husi diresaun kompetisaun simu ona klube hamutuk 5 mak rejistu hodi kompete iha apuramentu ba terseiru divizaun liga Futebool Femenino 2022.
“Ami husi diresaun kompetisaun FFTL daudaun ne’e hasai ona rejistrasaun ba klube sira atu mai rejistu hodi kompete iha divizaun datoluk liga Femenino nian komesa iha loron 21 fulan abril 2022 ne’ebé iha ona klube lima mai rejistu mak Nature FC, Waessel FC, Portu Taibesi FC, Relai Laleia FC no Kafe Ermera” ofisial kompetisaun FFTL Nonato Soares ba jornalista sira iha nia knaar fatin Bairro Formosa, Díli tersa (3/05).
Nia dehan, posibilidade klubu sei to’o ualu mak rejistu, tanba iha asosiasaun balu mak kontaktu ona sira munisipiu balun maibé seidauk konfirmadu mai rejistu.
Ofisial ne’e hatutan, tinan ne’e FIFA no AFC hakarak ekipa feto sira nia frekuensia sae entaun ida ne’e sai programa ba federasaun nian hodi rejistu ekipa sira ba divizaun datoluk liga Femenino nian atu nune’e hetan klube di’ak hodi promovidu ba segundu divizaun no primeiru divizaun ne’ebe hein katak ekipa barak hakarak mai rejistu atu kompete terseiru divizaun.
Nia informa, Rejistrasaun ba terseiru divizaun sei remata iha loron 31 fulan maiu 2022, hodi halo fali programa no orariu aprezenta fila fali ba ezekutivu sira depois manda ba AFC no FIFA katak sira atu realiza terseiru divizaun uluk depois mak segunda segunda divizaun no primeiru divizaun ne’ebe sei hala’o iha fulan agostu no tuir orariu sei uza ba kampu FFTL no mos stadium munisipal Dili maibé bainhira hetan autorizasaun husi SEJD.
ADS
