DILI – ohin sexta (06/05), Asosiasaun Futsal Timor-Leste (AFTL) hamautuk ho Federsaun Futebool Timor-Leste (FFTL), ofisialmente hala’o ona abertura ba Tasa Futsal Sub-14
Tasa Futsal Sub-14 ne’e Primeira vez iha Timor, ne’ebé mak organiza husi Asosiasaun Futsal Timor-Leste (AFTL), no eventu ne’e hetan partisipasaun masimu husi klubu hamautuk 12 entre klubu hirak ne’e iha klubu foun 3 mak hanesan Waesel Fc Atletico Ailok Laran no mós Relay Laleia Fc
Enkuantu klubu 9 seluk ne’e ne’e antes ne’e partisipa ona iha Pra Liga Futsal Timor-Leste ne’e mak Academica Fc, Becusse United, Boa Sorte Fc, Fiel, B’tal, As Jerman, Maudoko Fc, bas no Crazy Horse.
Iha seremonia abertura ba Tasa Futsal Sub-14 ne’e, vise prezidente Asosiasaun Futsal Timor-Leste (AFTL), Ivan Alves, hatete, iha dezenvolvimentu kualker Desportu sempre iha difikuldade, no Futsal mós hetan dezafiu barak liuliu rekursu humanus sei falta tebes Treinador no mós dezafiu boot ida mak infrastrutura sira no seluk tan.
Maibé dezafiu hirak ne’e la hamate espiritu Desportu, hanesan klubu balu ne’ebé mai husi fatin dook maibé sira hatudu nafatin vontade no espiritu hodi hakat mai to’o iha Dili
“Husu ba alin sira tenke fiar aan, ho atitude iha kampu laran, ha’u hakarak Agradese mós ba prezidente klubu sira Treinador no mós jogador sira deseju susesu ba imi hotu” tenik nia.
Iha fatin hanesan sekretáriu jerál Federsaun Futebool Timor-Leste (FFTL) Grigorio Correia, Agradese, ba ekipa Relay Laleia Fc no mós ekipa Waesel ne’ebé mak mai iha espiritu paisaun hodi kompete iha Tasa Futsal Sub-14 ne’e.
“Ha’u Agradese tanba ha’u haree iha ne’e Ermera no Manatutu la’o dook” tenik Grigorio.
Sekretáriu jerál ne’e mós husu ba komisaun organizadora Asosiasaun Futsal Timor-Leste atu identifika di’ak jogador sira tanba deskonfia iha jogador balu ho idade boot.
Nia mós husu ba klubu no jogador sira atu labele manipula idade hodi joga iha Jogu refere, tanba eventu refere atu lori labarik sira ba koñese Futsal la’ós atu buka vitoria.
Enteretantu Iha abertura Tasa Futsal Sub-14 ne’e loke husi klubu rua mak Atletiku Ailok Laran kontra Relay Laleia Fc, no iha jogu abertura ne’e Relay Laleia Fc mak sai manán na’in ho score 3-2.
Jogu Tasa Futsal Sub-14 ne’e hetan partisipasaun masimu husi dirijente klubu sira no mós Amantes Futsal sira no hetan seguransa husi PNTL
DVO
