DILI – Jogador Juvenil sub-14 Hernani Soares, susesu marka golu tolu alias ‘hattrick’ hodi lori Nia ekipa Academica Fc, “líki” nia adversáriu Maudoko Fc ho score 7-2, iha Jogu kontinuasaun Tasa AFTL Futsal faze grupu (C) mak hala’o iha kampu Futsal Habibie segunda (09/05).
Minutu Primeiru hahú ekipa rua lansa kedas kontra atake ba malu, tuir ida ida nia tekniku no tatiku, maibé ekipa Maudoko Fc, ne’ebé mak hatudu jogu furak husi ain ba ain konsege marka uluk golu ida liu husi jogador, Duarte hodi lori rezultadu ba 1-0.
Ho score refere halo jogu kontinua manas liu tan tanba ekipa rua halo kontra atake ho ritmu jogu ne’ebé makas liu husi lansa no sutu ne’ebé maka’as, maibé sorti di’ak monu liu ba ekipa Academica Fc hodi responde golu ida liu husi jogador, Cristiano da Silva, hodi hatuur score ba 1-1. Iha minutu 10.
Ho golu ne’e motiva liu tan ekipa Academica Fc hodi lansa suta fila fila liu husi tatika ne’ebé sira halo ho núne’e tama ba iha minutu 12, Academica Fc lídera hikas ho score 2-1, hafoin Luís Ximenes fura rede Maudoko Fc liu husi kabesada, ho score refere mantein to’o oras Primeira parte termina.
Kontinua ba jogu segunda parte Maudoko Fc ne’ebé tun ho ambisaun aas susesu marka golu ida hodi hatuur score ba 2-2 liu husi jogador Basilio.
Ho score refere halo ekipa Academica Fc halo mudansa ba tátika ho núne’e Hernani Soares, marka golu tolu tuir malu iha minutu 24, 25 no 26 hodi hatuur score ba 5 -2.
La para de’it ho ida ne’e maibé Agostu da Silva mós marka golu ida iha minutu 27 no Valdiano Ribeiro mós marka golu ida hodi lori nia ekipa manán ho score 7-2.
Husi rezultadu vitória ne’e lori ekipa Academica Fc hakat ba 8 finais nu’udar juara pool Tasa AFTL Futsal Sub-14 pool (C) ho pontus 6 husi joga dala rua manán hotu.
Enkuantu ho derota ne’e hatuur kedas Maudoko Fc, ba pozisaun ikus ho pontus 0, hanesan ho As Jerman ne’ebé okupa iha segundu klasifikasaun ho pontus 0 maibé diferensa golu.
DVO
