DILI — Adjuntu Sekretáriu Jerál Federsaun Futebool Timor-Leste (FFTL), Federico Martins, informa, Semana Oin, ekipa Selesaun Nasionál Feto Timor-Leste sei aranka ba Indonézia hodi halo training Camp (TC).
Ekipa Selesaun Nasionál Feto Timor-Leste, ne’ebé mak lídera husi treindora Minyoung Lee, ho nasionalidade Koreanu ne’e hala’o ona perparasaun kleur nune’e sei ba hala’o training Camp (TC), iha Bandung durante fulan ida molok kompete iha AFF Womens Championship 2022 iha Filipina, ne’ebé mak tuir orariu sei hahú iha loron 04 to’o 17 fulan Jullu tinan ne’e.
Tuir planu sira sei aranka iha loron 6 fulan junu tinan 2022 hodi halo TC no jogu amizade ho Indonézia maibé to’o oras ne’e PSSI seidauk responde karta husi FFTL tanba ne’e, sira husu klube Bali United FC hodi haloe jogu try out tanba federasaun iha kooperasaun di’ak ho klube refere.
“Ita nia selesaun nasional feto Timor-Leste sei aránka ba Indonesia hodi halo training camp iha loron 6 fulan junu 2022 ne’ebe antes ami manda ona karta ba PSSI atu halo jogu amizade no training camp iha Bandung maibe infelizmente seidauk iha resposta tan ne’e ami husu klube Bali United FC atu halo training camp iha sira nia fatin tanba ami iha kooperasaun diak ho klube ne’e no ita nia selesaun nasional sei halo training camp durante fulan ida hafoin ba partisipa AFF Womens Championship 2022 iha Filipina“, Frederico hateten
Nia hatutan, durante ne’e preparasaun selesaun nasional feto ne’e la’o ho di’ak tebes tanba iha liga domestika husi 2019 to’o 2021 ne’ebe sira preparasaun masimu tebes hein katak bele halo buat ruma iha AFF Womens Championship 2022 iha Filipina tanba federasaun nia hakarak hetan vitória ho nasaun balun atu nune’e hadia rekor tanba antes ne’e sempre derota ho golu barak no iha tinan ne’e ba dahuluk nasaun 11 mak partisipa la hanesan tinan uluk nian.
Núne’e mós Kapitaun selesaun nasionál feto Timor-Leste, Dolores V. da S. Costa, hatete, durante ne’e sira halo preparasaun iha Timor-leste durante tinan ida ona ne’ebé sira preparadu 95% maibé sira sei prepara sira nia mentalidade di’ak liu tan atu nune’e ba iha kompetisaun prontu atu hasoru adversariu sira.
Enteretantu Jogadora selesaun nasional feto Timor-Leste hamutuk 23 ho ofisial nain 10, mak sei aranka iha semana oin.
ADS
