DILI– Klubu Primeiru Divizaun Liga Cambodia, Angkor Tiger Fc, ofisilmente kesi ona kontratu ho jogador selesaun nasionál Timor-Leste Mouzinho Barreto de Lima. Maibé to’o oras ne’e Klubu AD SLB, ladauk hetan informasaun ruma husi Jogador.
Iha loron 1 fulan Juñu tinan 2022, klubu, premier league, Angkor Tiger Fc, husi nasaun Cambodia, ofisilmente anunsiu ona Liu husi pajina ofisial klubu nia katak jogador Selesaun Nasional Timor-Leste, Mouzinho De Lima, ho númeru kamizola 10 ne’e iha ona konkordansia ho klubu refere.
Maske nune’e klubu Primeira Divizaun Liga Timorense, AD SLB Laulara, nu’udar klubu atual Mouzinho de Lima nian to’o oras ne’e seidauk hetan informasaun ruma husi sira nia jogador Mouzinho de Lima.
“ita hotu hetan notisia husi media AFC no hahu viral ona iha Facebook katak klube Cambodia Angkor Tiger FC kontratu ona jogador Mouzinho de Lima maibe to’o ohin loron klube rasik sidauk iha informasaun ruma husi Mouzinho” sekretariu jeral SLB Laulara Domingos Caeiro ba jornalista JHD via WhatsApp kinta (2/06).
Nia hatutan Maski nune’e SLB orgullu tamba iha tan jogador Timor oan hetan fiar husi klubu estranjeiru Angkor Tiger FC tanba ida ne’e mak klube nia objetivu.
Jogador Mouzinho de Lima, hahú jogu hamautuk ho klubu AD SLB desde Liga Futeból Amadora hamrik iha 2015 to’o tinan 2021.
Mouzinho mós nu’udar Jogador importante ida iha klubu AD SLB desde LFA to’o agora transfere ba LFTL Mouzinho ho ekipa susesu lori SLB sai kedan Kampeaun LFA iha tinan 2015
Iha tinan 2022 Mouzinho de Lima reprezenta Timor-Leste husi selesaun nasional U-23 joga iha AFF, liu husi nia performa berliante ne’e susesu lori nia ekipa Timor Leste sai terseiru Lugar iha eventu refere.
La’ós de’it ho ida ne’e Mouzinho mós nafatin hatudu nia jogu espektakiler iha eventu SUZUKI Cup iha Tailandia no mós iha Sea Games ne’ebe mak hala’o iha Vietnam.
Ho prestasaun ne’e halo klubu Ankor Tiger FC laran monu hodi fo kontratu atu reforsa klubu refere iha liga Cambodia epoka 2022-2023.
ADS
