DILI – Ekipa Selesaun Nasional Femenina Timor-Leste segunda (06/06), ohin, desloka ona ba Bali, Indonesia, hodi hala’o training Camp (TC), durante fulan ida, no hala’o jogu amizade hodi perpara ekipa, molok ba kompete iha Asian Football Federation (AFF) Women’s Championship 2022, iha Filipina, ne’ebé mak sei realiza iha loron 04 to’o 17 fulan Jullu tinan ne’e.
“Ohin ita nia ekipa selesaun nasional feto aránka ba Bali, Indonesia halo training camp durante loron 28 nia laran antes partisipa AFF Women’s Championship 2022 iha Filipina ne’ebe durante training camp Ita mos sei halo jogu amizade dala tolu ka haat ho ekipa sira iha Bali” Adjuntu sekretariu jeral FFTL Frederico Martins ba jornalista sira iha Xanana Sport Center Bairro Formosa Dili Ohin.
Sekretariu hatutan, ba jogu amizade tenta mos selesaun nasional feto Indonesia maibe seidauk iha resposta husi PSSI (Persatuan Sepak bola Seluruh Indonesia) tan ne’e sira mos husu ona klube sira iha Bali maibe rezultadu semana oin mak sira bele hatene.
Iha fatin hanesan treinador selesaun nasional feto Timor-Leste Monyoung Lee hatete, sira halo ona preparasaun husi fulan janeiru ne’ebe hein katak iha sorti bele hetan susesu hodi manan nasaun sira hodi sai manan nain iha kompetisaun AFF Women’s Championship 2022 iha Filipina.
“Ami halo ona preparasaun husi fulan janeiru ne’ebe ita hein katak Ita iha sorti bele hetan susesu hodi manan nasaun sira hodi sai manan nain iha kompetisaun AFF Women’s Championship 2022 iha Filipina“, treinador hateten.
Núne’e mós kapitaun selesaun nasional Femenino Timor-Leste, Dolores V. da C. Silva, hatete, nia sente kontente bele reprezenta ona feto maluk no nasaun Timor-Leste ba kompetisaun iha rai liur no nu’udar kapitaun iha kampu laran mak sai líder maibe iha liur rona treinador sira.
“Hau sente orgulllu no kontente bele reprezenta ona feto maluk no nasaun Timor-Leste ba kompetisaun iha rai liur no hau nu’udar kapitaun iha kampu laran mak sai líder maibe iha liur hau rona treinador sira” dehan Dolares
Kapitaun selesaun Nasionál Femenina ne’e afirma, sira iha esperansa bele manan nasaun balun iha kompetisaun AFF Women’s Championship 2022 iha Filipina.
Jogador selesaun nasional feto Timor-Leste nain-23 hamutuk ho ofisial nain sanulu sei ba training Camp iha stadium Kapten I Wade Dipta Gianyar iha Bali, Indonesia.
ADS
