DILI – Ohin delegasaun husi Federsaun Internasional Futebool Asosiasaun (FIFA sigla ingles), hasoru malu ho Federsaun Futebool Timor-Leste (FFTL), hodi dezenvolve Futebool iha rai laran no atu hadia Estadion Munisipal Dili.
Delegasaun FIFA Lavin Vignesh Jayamurungan ho Mehmet Dirlik to’o iha Timor Leste ohin no hala’o kedas enkontru ho FFTL.
Hafoin remata enkotru ho delegasaun FIFA, prezidente Federsaun Futebool Timor-Leste (FFTL), Francisco Jerónimo, hatete, FIFA prontu hadia Stadion Munisipal Dili ho núne’e FFTL sei rezolve estatutu Stadion Munisipal Dili nian ho parte governu.
“Ohin ami enkontru ho delegasaun husi FIFA ne’ebe sira koalia ho ami ezekutivu sira iha FFTL ne’ebe FIFA informa seriu hakarak dezenvolve futebol iha Timor-Leste ne’ebe FIFA hakarak hadia Infrastrutura mak hadia Stadion Munisipal Dili maibe ita nia problema mak rai Stadion ne’e tan ne’e ha’u husu ba sira fo tempu mai ha’u koalia ho Ministeriu Justisa para bele entrega dokumentu rai Stadion ne’e ba ami atu nune’e sira halo ona tanba FIFA iha osan rasik ba ida ne’e” Prezidente FFTL Francisco Jerónimo ba jornalista sira iha nia knaar fatin Bairro Formosa, Díli kuarta (8/06).
Prezidente hatutan, Sira hetan ona dokumentu ona husi Ministeriu Justisa maibe sira dehan ne’e seidauk bele garante federasaun atu sai nain ba rai stadium ne’e tan ne’e ohin nia husu ba FIFA fo tempu ba nia bele koalia ho Ministeriu Justisa atu nune’e fo garantia ba FIFA hodi bele hadia stadium ne’e tanba sira hakarak Timor-Leste sai uma nain ba jogu Internasional atu nune’e povu Timor-Leste bele asiste jogador Timor oan joga ho nasaun sira iha Timor-Leste hanesan jogador sira ba joga iha nasaun seluk sira.
Nia informa, parte ezekutivu sira iha esforsu para bele hetan dokumentu rai ne’e lalais atu nune’e FIFA bele mai hadia Stadium Munisipal Dili ne’ebe FIFA husu ba sira atu koalia ho Ministeriu Justisa bele halo revizaun oituan deit ne’e los ona tanba ohin mak FIFA hetan dokumentu rai ne’e semana oin kedas sira haruka ekipa ida bele mai halo verifikasaun ba rai ne’e kedas.
ADS