DILI – Prezidente Federasaun Taekwondo Timor-Leste (FTTL) Gabriel da Costa, informa, semana oin FTTL sei lori atleta nain-6 hodi ba kompete iha Asian Championship, no Korea Open, iha Korea Sul, atu atleta sira bele hetan pontu no esperiénsia molok kompete iha olimpiade 2024 iha sidade Paris, Fransa.
“Agora ita prepara atleta feto tolu mane tolu atu ba partisipa eventu Asian Championship no Korea open iha Korea Sul tanba eventu ne’e importante tebes ita nia Modalidade Taekwondo Timor-Leste tenki partisipa duni atu nune’e ita nia atleta sira bele hetan pontu no esperensia hodi partisipa olimpiade 2024“, informa, Gabriel ba jornalista sira iha GDD Caicoli, Díli kuarta (15/06).
Nia hatutan, dadaun ne’e federasaun prepara atleta sira para partisipa eventu rua importante ne’e tanba hanesan eventu internasional ka world championship hodi hetan pontu atu nune’e atleta sira bele hetan pontu hodi partisipa olimpiade 2024 ne’ebe tuir lolos atleta ne’e ida deit maibé federesaun fo espasu mos ba atleta sira seluk partisipa eventu ne’e para sira bele hetan esperensia foun hodi nune’e tuir eventu internasional hodi hetan buat ruma hanesan Sea no Asian games tanba nasaun sira seluk agora hetan medalla osan iha eventu internasional ne’e sempre partisipa eventu sira hanesan ne’e.
Nia relata, atleta sira ne’e halo preparasaun antes jogu Sea Games ne’ebe sira prepara atleta fight nain haat no ponse nain- rua ne’ebe federasaun intensiva koalia ona ho treinador sira rekolla ona atleta sira nia dadus no sira nain-6 feto tolu Mane tolu, feto sei joga iha under 46 kg no 49 kg ho mane sei joga iha under 58 kg no 64 kg ne’ebe sira nia viazen sei aranka ba Korea Sul iha loron segunda semana oin hein katak ohin loron SEJD bele aprova ona ASH hodi submete ba parte finansa atu aloka orsamentu mai federesaun atu nune’e sira bele aranka tanba loron limitadu tebes.
Nia informa, atleta sira iha Korea Sul durante loron sanulu tanba sei partisipa eventu rua mak Asian Championship no Korea Open ne’ebe Asian Championship sei hahu iha loron 24 to’o 28 fulan junu no Korea Open sei komesa iha loron 29 fulan junu to’o 1 jullu 2022 ne’ebe orsamentu ba eventu iha sira nia pedidu hatama ba SEJD ho montante 36.400 USD ne’ebe hein katak parte governu bele aprova ho montante ne’e.
ADS
