DILI – Novidades tristeza hafalun orgaun Liga Futebool Timor-Leste (LFTL), tanba lakon ona Sekretariu jerál, Fransisco Marcal da Silva, ne’ebé mak hakotu i’is iha Hospital Nasional Guidu Valadares (HNGV) tanba sofre moras komplikadu.
Novidades tristeza ne’e hafalun membru LFTL no estrutura lakon oan líder di’ak ida ne’ebé durante ne’e dedika aan ba Futebool
Fransisco Marcal da Silva, nu’udar sekretáriu jerál LFTL hakotu i’is ho idade 59 tanba sofre moras komplikadu.
Matebian Francisco Marcal da Silva moris iha Same iha tinan 1963, no matebian mate iha Hospital Nasional Guidu Valadares iha loron sabadu (18/06/2022) mais ou menus tuku 3 madrugada. No matebian husik hela fen no oan na’in 4 kompostu hosi feto 3 no mane 1.
Matebian hahú assume kargu nu’udar sekretáriu jerál iha Liga Futebool Timorense (LFTL) iha tinan 2020.
Iha intervista ho Diretor Relasaun Publikas Liga Futebool Timorense (LFTL) Diego Neto Fraga, hatete, Matebian Francisco Marcal da Silva nu’udar sekretáriu ezekutivu iha LFTL nu’udar membru ezekutivu triste boot no lakon tebes figura di’ak ida, no maske matebian husik ona mundu ne’e maibé sira sei kontinua obra ne’ebé mak matebian husik hela.
“Durante tinan 2 ami serbisu hamutuk, nia dedikasaun ba Futebool ne’e sem limite i familia boot Liga Futebool Timor-Leste no mós ema sira ne’ebé iha paisaun ba bola sente lakon Fransisco Maracal da Silva” dehan Diego ho sentimentu triste hafaoin vizita matebian Francisco Maracal iha palpaso Dili (18/06).
“Ami espera katak ninian obra ne’ebé nia oferese ba iha mundu Futebool sei la haluha liu liu ba jerasaun Timor oan sira obra sira ne’e ba ami sei banati tuir saida mak nia husik hela” tenik nia
Nia dehan, Obra ne’ebé mak matebian husik hela membru LFTL sei halo sai hanesan referensia ba iha sii nia vida tomak hodi halo Dezenvolvimentu Futebool ne’ebé dala ida tan sente triste boot tebetebes ba iha Francisco Maracal da Silva ninia mate sente triste tanba nia husik ona mundu no sei la fila ida ne’e mak sentimentu profunda.
Diretor Relasaun Publikas ne’e fó korajen ba Família ne’ebé lutada katak ba família mós tenke forsa simu situasaun ne’ebé mak akontese.
Nia haktuir, Matebian Francisco Maracal Ema ne’ebé ho dedikasaun tomak tanba nia ema ne’ebé mak asume kargu ne’ebé boot tebetebes entaun nia oinsá organiza no dezenvolve ida ne’e nia hatudu ona i nia Obra ne’e nia husik hela ne’e mak sai hanesan referensia.
Iha fatin hanesan, Oan mane husi Matebian (Francisco Maracal da Silva) Renato da Silva, haktuir, matebian nu’udar futebolista ida iha tempu okupasaun Indonézia iha matebian joga iha klubu Futebool Bansuma
Nia Dehan, Iha tinan 2020 Matebian Francisco Marcal, hetan Konfiansa hodi assume kargu nu’udar sekretáriu jerál iha orgaun Liga Timorense (LFTL).
Nia haktuir, Matebian asume kargu ne’e kondisaun ladún di’ak, maibé Matebian Kontinua asume kargu refere tanba hetan Konfiansa hosi amante hadomi bola sira maske kondisaun saúde ne’ebé mak la saudavel ona maibé esperimentu no vontade ho mehi ida hakarak dezenvolve Futebool iha rain laran matebian nafatin dedika aan iha LFTL.
“To’o iha fulan Maiu tinan 2022 kondisaun komesa grave liu tan ho núne’e matebian iha de’it uma, maske núne’e ho kargu ne’ebé mak nia asume iha kuarta ruma ne’ebé hodi parte LFTL haruka nia nafatin hala’o nia dever hodi asina karta ne’ebé mak nia simu hosi LFTL” dehan Renato
Nia haktuir, iha segunda feira (13/06) ne’e Família hosi matebian lori ba Hospital Nasional Guidu Valadares (HNGV) hodi halo tratamentu ba saúde maibé iha loron sabadu mais ou menus tuku 3 madrugada matebian hakotu i’is
“Pai mate tanba Moras komplikadu tanba sofre moras Ran Midar Stomok moras fuan no grave liu iha Rins” tenik nia
Dadaun ne’e mate isin Matebian Francisco Maracal da Silva, rai hela iha nia rezidensia iha palpaso Dili no ohin hetan ona vizita hosi membru LFTL no mós eis futebolista sira no mós husi familia hosi matebian rasik.No matebian sei haloot iha semináriu Becusse iha loron aban domingu (19/06).
Charlly Junior
