DILI– Relasiona ho reziganasaun klubu Primeira Divizaun Lalenok United Fc, ne’ebé mak deside hodi rezigna aan hosi Liga Futebool Timorense (LFTL), ba epoka 2022-2023. Ne’e hamosu tristeza boot ba família Futebool iha Timor Leste.
Liga Futebool Timorense ba epoka 2022-2023, ne’e sei Realiza iha fulan loron 18 fulan Agostu, maibé notisia tristeza hafalun fila fali Futebool Timor-Leste basa klubu Zigante Lalenok United Fc, tenke rezigna aan hosi Liga Futebool Timorense tanba FFTL la proteje klubu nia problema, ne’ebé mak antes ne’e Italo Soares Pementel hala’o keisa hasoru klubu.
Jogador ho nasionalidade Brazil ne’e halo keisa ba klubu Lalenok United Fc, tanba klubu la fó salariu 7.500 USD, iha iha Époka 2021, wainhira Lalenok United Fc, rekruta nia hodi reforsa klubu Lalenok United Fc, hodi kompete iha jogu kualifiksaun AFC Cup.
Observador Futebool iha Timor Leste, Alex Vong, konsidera, Lalenok United FC ne’ebe deside rezigna husi Liga Timorense epoka ne’e tanba FFTL la iha protesaun no prekupasaun ba klube ne’ebe problema ho jogador Italo Soares tan ne’e klube hetan sansaun husi FIFA.
“Ba hau nu’udar gosta futebol no familia boot pratika futebol iha Timor-Leste sente triste boot tanba ema sira ne’ebe investe sira nia osan, tempu no aset iha futebol maibé FFTL la konsidera no hakuak asionista sira iha klube ne’e iha futebol ne’ebe halo futebol hasoru problema no klube bele sai husi futebol maski FFTL lakoi klube nain sira sai husi futebol maibé hakarak ema barak tama iha futebol para atu dezenvolve futebol lori ba oin iha Timor-Leste tanba foti Mesak labele presiza ema hotu nia kontribuisaun” dehan observador Alex Vong ba JHD iha Timor Plaza Comoro, Díli sesta (1/07).
Nia explika alende sai kampiaun ba Liga Futebol Amadora no reprezenta Timor-Leste ba joga iha kualifikasaun AFC nian ne’ebe klube Lalenok United mós kontribui makas ba dezenvolvimentu futebol iha nasaun ida ne’e liu-liu iha epoka tolu nia laran husi 2017, 2018 no 2019 ne’ebe mai husi divizaun datoluk sae to’o divizaun dahuluk no sai kampiaun.
Nia dehan, Lalenok United nia kontribuisaun boot tebes tanba klube Lalenok United Fc mos kualifikadu ba AFC iha 2019 laos tanba nia kampiaun deit iha 2019 maibe nia prense rekezitu ne’ebe AFC fo mai liu husi Club Licence Administration System (CLAS) tan ne’e klube ba partisipa Kualifikasaun AFC ne’ebe klube ba laos hamorin deit klube nia naran maibe FFTL, LFTL, Klube tomak no familia futebol Timor-Leste nia naran morin tanba sira nia kontribuisaun ne’ebe fo susesu boot ba futebol Timor-Leste.
Nia informa, problema Lalenok United FC nian lolos FFTL ho orgaun LFTL iha kompetensia masimu atu proteje no buka solusaun ba problema ne’ebe klube hasoru ho Jogador estranjeiru Italo Soares ne’ebe akontese iha 2021 ho Liga Timorense ne’ebe realiza kompetisaun metade deit ho fasilidade minimu tanba efeitu husi pandemia covid-19 tan ne’e orgaun LFTL no FFTL bele justifika ida ne’e ba FIFA maibe FFTL la justifika ne’e hatudu katak sira la iha atensaun no prekupasaun ba klube sira.
Alex dehan, problema Lalenok United FC nian halo klube barak preokupa tanba la iha protesaun husi FFTL ho orgaun LFTL ne’ebe halo ema barak hakfodak ba situasaun ne’ebe difisil tebes ba Lalenok United FC ne’ebe la marka prezensa klube ne’e iha Liga Timorense epoka 2022 ne’e kompetisaun la iha kualidade ona tanba klube ne’e hatudu ona kualidade tanba apresentasaun iha kampu.
Alex akresenta, ba FFTL no orgaun LFTL tenki fo protesaun no preokupa ba klube sira karik sira hetan problema ruma labele husik sira hasoru mesak bolu sira tuur hamutuk buka solusaun karik FFTL no orgaun LFTL bele kontribui rezolve tanba andamentu pratika futebol iha Timor-Leste presiza kontribuisaun klube nian tanba klube la iha lalika koalia futebol no mos FFTL no orgaun LFTL mos la eziste iha Timor-Leste.
Entretantu iha loron 23 fulan junu 2022 prezidente Lalenok United FC Pedro Belo dirije karta ba FFTL no LFTL, sira rezigna husi Liga Timorense epoka ne’e tanba problema Italo Soares keixa to’o FIFA ikus mai FIFA foti desizaun katak durante Pandemia covid-19 Klube lá fo salariu ba jogador ho montante 7,500.00 USD afeta tebes ba dignidade Klube Lalenok nian no kontratu jogador klube hatama ba FFTL maibe federesaun la ajuda klube hodi rezolve no buka solusaun ba problema entre Klube ho jogador Ítalo Soares maibe klube mak sala nafatin tanba ne’e klube deside hodi taka atividade futebol ne’ebe FFTL no LFTL organiza ba rai liur no rai laran inklui rezigna husi Liga Timorense epoka 2022.
ADS
