DILI – Asosiasaun Futsal Timor-Leste (AFTL) tuir planu anterior sei realiza liga futsal Timor-Leste iha fulan juñu maibé tan sei hein aprovasaun husi parte ezekutivu sira iha Federasaun Futebol Timor-Leste (FFTL) maka AFTL kria fali planu tentative ba fulan agostu.
Iha Tinan ida ne’e AFTL planeia ona atu realiza liga futsal Timor-Leste iha fulan juñu, maibé tan proposta ba FFTL seidauk hetan desizaun final, nune’e planu refere adia fali ba fulan agostu. Maske nune’e, planu refere mos seidauk serteza.
“Antes ne’e ami nia orariu liga futsal Timor-Leste realiza iha fulan juñu no proposta ami hatama ona ba FFTL maibe fundu mai husi FFTL, ne’ebe parte FFTL dehan ba ami hein parte ezekutivu federasaun enkontru iha fulan ida ne’e nia laran hodi deside no aprova fundu ba realizasaun liga. Ne’ebe ita planu fali realiza liga futsal iha fulan agostu”, Sekretariu jeral AFTL Fernando Baptista ba jornalista JHD iha kampus UNTL Bairro Formosa, Díli sesta (15/07).
Sekretariu jeral ne’e hatutan, tanba sei hein desizaun husi membru ezekutivu federasaun ba aprovasaun fundu ba liga futsal iha tinan ne’e, tan ne’e, sira seidauk informa orariu serteza ba klube sira atu mai halo rejistrasaun no halo transferensia ba jogador.
Fernando informa, kampu ne’ebe atu utiliza hodi realiza liga futsal mak pedidu sira hatama ona ba SEJD atu uza zinajiu desportu Díli, hodi hein SEJD, FFTL no AFTL esforsu buka fatin ruma para konstrui kampu ba liga futsal nian, ne’ebe pedidu submete ba SEJD.
Liga futsal Timor-Leste ne’ebe AFTL sei realiza iha tinan ne’e mak divizaun dahuluk kompete husi klube sanulu no divizaun daruak husi klube 14, klubu sira ne’e mai husi pra-liga pra liga futsal Timor-Leste iha tinan kotuk, 2021.
ADS
