DILI–Arbitu Timoroan Romario Saldanha dos Santos Tety, orgullu sai asintente arbitu iha kompetisaun Asean Football Federation (AFF) U-19 Championship 2022 ne’ebé mak realiza iha Nasaun Indonézia.
Arbitu Romario nu’udar Timoroan dahuluk ne’ebé mak hetan oportunidade no rekomendasaun hosi AFF hodi sai asistente arbitu iha eventu rejionál AFF U-19 ne’ebé mak hala’o iha nasaun Indonézia.
“Nu’udar Timoroan hau senti orgullu tanba hetan rekomendasaun husi AFF tanba Timor-Leste iha arbitrajen prinsipal ida no asistente mak ha’u ne’ebe hetan lisensa A AFF ne’ebe ha’u rasik mak reprezenta sai asintente arbitrajen iha kompetisaun nivel AFF ne’e“, arbitrajen Romario S. dos S. Tety ba jornalista sira iha Xanana Sport Center Bairro Formosa, Díli sesta (15/07).
Nia haktuir, iha kompetisaun ne’e nia hetan esperensia foun nu’udar arbitu Timoroan tanba buat ne’ebé akontese iha ne’ebá diferente ho futebol iha Timor-Leste ne’ebe nia ritmu jogu sa’e kompara ho jogu iha Liga Timorense no durante iha kompetisaun ne’e nia dirije jogu dala lima, iha loron dahuluk nia hetan fiar dirije jogu sai asistente arbitu daruak no jogu tuir fali mai sira fo fiar ba nia dirije jogu ho asistente dahuluk no tuir fali mai halo rotasaun ba asistente dahuluk selae daruak ne’ebé nia asistente arbitrajen dahuluk dala tolu no daruak dala rua.
Romário husu mós husu ba arbitu Timoroan hotu tenki esforsu labele lakon esperansa no dixiplina nafatin husi an rasik atu nune’e intruktor husi AFF ne’ebé atu mai hare’e ne’e ba dahuluk tenki liu fitnes tes no prestasaun durante diriji jogu iha Liga.
Tuir dadus hosi Arbitrajen iha Timor-Leste arbitu ne’ebe hetan lisensa nível A hosi AFF mak arbitu prinsipal Pedro Carvalho no asistente arbitrajen Romário S. dos Santos Tety.
Arbitu iha Timor-Leste hamutuk 567 husi lisensa nível A hamutuk nain rua, nível B iha nain sanulu, nível C iha nain- 68 no lisensa D iha nain- 487 ne’ebe hetan formasaun husi 2019 to’o 2021.
ADS
