DILI- Partidu Kongresu Nasionál Rekonstrusaun Timorenses (CNRT-Sigla Portuges) sei realiza kompetisaun Taça Xanana 2022, hodi komemora loron konsulta populár 30 Agusto.
Tinan ne’e Timor-Leste sei selebra loron nasionál 30 de Agostu ba dala 23 1999 – 2022, ho núne’e partidu Kongresu Nasional Rekonstrusaun Timorense (CNRT), sei Realiza Taca Xanana 2022.
Tuir Diretor Kompetisaun Taça Xanana, Elizeu Isac hateten, ne’e inisiativa husi estrutura partidu nian hanesan komemora loron konsulta popular 30 Agusto tinan 1999 ho jogu futsal.
“Ami sei realiza Taca Xanana 2022 nian, ami la autoriza jogadór ne’ebe joga iha kampu boot no pra-liga futsal atu inklina iha ekipa mane nian, ita fo oportunidade ba jogadór foun sira liu husi Taca Xanana 2022 ne’e“, dehan Diretór kompetisaun Elizeu Isac ba Jornalista iha sede CNRT, Tersa (19/07/2022).
Nia hatutan, ko’alia kona-ba ekipa feto nian jogadór menus hela, sei autoriza klube sira bele rejistu jogadór feto na’in tolu, hanesan motivasaun ida ba kolega sira seluk.
“Ami sei autoriza jogadór feto na’in tolu husi jogadór selesaun Nasionál nian hodi fo motiva jogadór sira seluk“, katak nia.
Elizeu sublina, jogu ne’e kompostu husi Mane 32 no feto 32 ho klube 64, joga ne’e sei full competion.
Diretór kompetisaun Elizeu hateten, rejistu hahu ona iha loron Sabadu 16/07/2022 no sei taka orasida loraik tuku 5:30, daudaun hein hela klube sira bele mai rejistu, falta Suku neen mak seidauk rejistu hodi kompleta 32 klube.
Diretór kompetisaun ne’e afirma, jogu ne’e sei hahu iha loron 23 Fulan Agusto tinan ne’e, preoridade liu ba munisípiu nian liuliu Suku sira.
Elizeu hateten, daudaun ne’e rejistu ona klube hamutuk 29 iha munisípiu Dili nian, bainhira seidauk kompletu ba 32 klube mak bele bolu tan haat bele rejistu.
Diretór kompetisaun ne’e esplika, orsamentu ba kompetisaun ne’e mai husi kontribuisaun estrutura partidu CNRT nian hodi anima juventude sira liuhusi desportu.
Husi kompetisaun ne’e iha mos premiu ba primeiru lugar, segundu, terseiru no kuartu lugar, sei hetan Taca ida ho osan.
“Kona-ba montante osan nian ha’u seidauk sita maibé iha final kompetisaun ita sei hetan ho montante ne’ebe di’ak“, katak nai.
Elizeu informa, Taça Xanana ne’e la’os realiza ba tinan ne’e de’it maibé kada tinan sei halo nune’e bele hafanu joven sira.
Nia dehan, kompetisaun ne’e sei hahu iha loron 23 fulan Augostu tinan ne’e, daudaun ne’e ekipa sira rejistu kuaze porsentu 80%, karik kompletu ona sei realiza teknikal meeting iha loron 21 to’o 22 fulan Jullu ne’e.
Elizeu hateten, sei utiliza kampu futsal Bebora, agora halo reabilitasaun horiseik mak foin finaliza, preparasaun mos kuaze porsentu 80% ona, karik loron ida ka rua sei kompleta ba porsentu 100% no hein atu realiza de’it kompetisaun ne’e.
Caet
