DILI – Governo liu husi Sekretariu Estadu Juventude no Desportu (SEJD), envia ona karta ba orgaun rua maibé Federasaun Futeból Timor Leste (FFTL) mantein nonok no Liga Futebool Timor-Leste (LFTL) kontinua hein.
Tuir Diretór Administrasaun no protokolu LFTL, Janio Tilman katak, iha loron Kinta (20/07/2022) governu liu hosi Sekretáriu Estadu Juventude no Desportu (SEJD) envia ona karta ba órgaun Liga Futeból Timor-Leste (LFTL).
Diretór administrasaun LFTL ne’e afirma, daudaun ne’e governu halo parte hanesan patrosinadór hodi apoiu nafatin kompetisaun iha tinan ne’e.
“Ami haree ba konteudu karta ne’e, inisiativa liga nian hahú iha loron 23 fulan Fevereiru tinan ne’e, ita halo ona aprezentasaun kalendáriu ba FFTL tuir planu realiza jogu iha fulan Abril, LFTL simu ona karta husi SEJD no hein desizaun husi FFTL atu fó resposta”, tenik Tilman ba Jornalista iha Estadium Munisípal Dili, Segunda (25/07/2022).
Tilma hateten, kona-ba konteudu karta nian husi SEJD katak, iha tinan kotuk 2021 hala’o ona enkontru two parte ho orgaun rua, agora orgaun rua mak lidera jogu ba époka tinan ne’e. Maibé Governu nafatin apoiu.
“Liga prontu bainhira mak atu halo enkontru, tanba LFTL esforsu lubuk ida maibé seidauk iha resposta husi FFTL, tanba nia mak aman ba futeból ba nasaun ne’e” Janio afirma.
Janio afirma, parte LFTL sei la halo tentativa ba FFTL kona-ba enkontru refere, tanba karta ne’ebé SEJD envia ne’e ba direta ba orgaun rua ne’e hodi realiza enkontru try parte ba époka tinan ida ne’e.
“Tanba ne’e parte LFTL hein desizaun husi FFTL ne’ebé sai aman ba paixaun futeból entaun orgaun Liga prontu hein bainhira mak hahú” dehan Janio.
Relasiona ho asuntu ne’e JHD tenta ona atu halo konfirmasaun ho FFTL maibé Prezidenti FFTL sei okupadu hela ho servisu seluk.
Caet
