DILI- Ekipa uma nain Quartel General simu derota 5-4 husi ekipa adversariu Estrela Baguia iha jogu abertura pool (A) Taça FALINTIL Futsal 2022, hala’o iha kampu Futsal Fatuhada Tersa (09/08/2022).
Iha insiu jogu ekipa rua hotu hotu hatudu jogu di’ak iha kampu liu husi tatika ida-idak nia maibé ekipa AD Estrela Baguia hatudu sira nia ritmu jogu furak AD Estrela Baguia domina bola iha parte primeiru ho nune’e iha minutu balun jogadór Carlos Godinho numeru 7 marka uluk golu ida hodi hatuur score ba 1-0.
Ho Score ne’e la dura ho tempu naruk hafoin ekipa Quartel General responde hikas golu ida iha minutu balun liu husi jogadór Nicson Martins hodi hatuur score ba 1-1.
Liu de’it minutu ida AD Estrela Baguia lídera hikas jogu hafoin jogadór Adrial Perreira fura rede Quartel Geral hodi muda score ba 2-1.
Ho golu ne’e jogu kontinua manás hodi ekipa Quartel General halo mudansa ba jogu hodi produs golu liu hosi jogadór Beni Francisco hodi muda score ba 2-2.
Maibé ekipa adversariu la nonok hodi aumenta score ba 3-2 liu hosi jogadór Ivan Araujo ho numeru kamiza 22.
Maske jogu parte primeiru husi ekipa rua kontinua kontra ataka ba malu maibé la iha tan golu ruma mak ekipa AD Estrela Baguia lídera ho score ba 3-2.
Kontinua jogu segunda parte ekipa Quartel General la persija tempu naruk hodi fura tan rede AD Estrela Baguia liu husi jogadór Jose Grande ho numeru kamiza 11 ne’ebe esforsu hodi muda score ba 3-3.
No iha minutu balun ekipa AD Estrela Baguia halo mudansa tatika hodi hatuur score ba 4-3, maibé ekipa Quartel General la dukur jogadór Jose Grande konsege hamorin nia naran hodi hatuur tan score ba 4-4.
Liu de’it minutu balu ekipa Estrela Baguia lidera hikas hafaoin jogadór Juzinho Celizia ho numeru kamiza 21 muda score ba 5-4.
Antes temina jogu defeza husi AD Estrela Baguia komete erru iha area grandeal nune’e arbitu deside hodi fo pinalti maibé guarda rede konsege salva bola, ho núne’e too termina jogu vitoria ba Estrela Baguia ho score 5-4.
Hosi rezultadu vitoria ne’e hatuur ekipa AD Estrela Baguia Fc, iha pozisaun Primeiru grupu (A), ho pontus 3, enkuantu ekipa uma na’in Quatel Geral iha pozisaun ikus ho pontus 0.
Caet
