Dili – Vise Kordenador Movimentu Amante Futeból Timor Leste, Inocensio de Jesus Xavier, husu ba komisaun anti korupsaun (CAC) tenke halo investigasaun ba orgaun Liga Futeból Timorense (LFTL), no Federsaun Futeból Timor Leste (FFTL), no mós Sekretariu Estadu Juventude Desportu SEJD (SEJD), Relasiona ho osan restu hamutuk 71,277.66 USD hosi atividade Liga epoka 2021 nian ne’ebé mak la haruka fila ba kofre estadu.
Vise Kordenador Movimentu Amante Futeból Timor Leste, Inocensio de Jejus Xavier, hato’o Kestaun ne’e ba Jornalista sira iha edifisiu Fongtil kaikoli Dili, tersa (16/08).
“CAC tenki halo investigasaun liu husi LFTL, FFTL to’o ba SEJD ba regra ne’e liu-liu ba inkumprimentu ba regra sira tanba sira la halo tranferensia fila fali orsamentu estadu ne’e ba konfre estadu antes iha loron 31 fulan Dezembru 2021 ne’e viola lei orsamental governu” dehan nia.
Nia explika, orsamentu estadu nian ne’ebe SEJD aloka mai LFTL ba epoka 2021 atraveza husi FFTL se orsamentu aloka mai Liga Timorense epoka 2021 mak la konsege utiliza tenki fila fali ba konta estadu labele husik iha FFTL bele mos husu autorizasaun bainhira nesesidade atu utiliza orsamentu restu ne’e ba atividade saida tenki klaru atu nune’e garante kontabilldade no governasaun diak atu nune’e sai modelu ba instituisaun seluk halo tuir label halo buat ne’ebe tuir gostu tanba federasaun ne’e orgaun independente ne’ebe kada tinan hetan finanseiru mai husi FIFA.
“Maibe tanba saída mak iha fulan maiu 2022 foin sira halo tranferensia no to’o agora i orsamentu restu ne’e sei iha konta federasaun ne’ebe regra fundu ba transferensia publiku mak ne’e tanba tama ona ba tinan foun ne’e tama ona reorsamentu tenki koalia sai orsamentu 2022 labele koalia fali orsamentu 2021 tanba orsamentu reaprovadu tiha ona iha 2022 ne’e orsamentu 2021 taka ona labele koalia tan”.
Entretantu Iha tinan 2021 Sekretariu Estadu Juventude no Desportu (SEJD), transfere orsamentu ho montante 310.005.00 bá Liga Futeból Timor Leste (LFTL), atraveza liu hosi Federsaun Futeból Timor Leste (FFTL) hodi hala’o atividade Liga Timorense ba epoka 2021 nian.
Iha loron 28 fulan Setembru tinan 2021 FFTL haruka de’it orsamentu 40 % hosi orsamentu ho montante 310.005.00, ba LFTL.
No Federsaun Futeból Timor Leste foin transfere orsamentu porsentu 60 % ne’e bá LFTL iha loron 18 fulan Janeiru tinan 2022.
Ho núne’e orsamentu ho montante 310.005.00 dólar Amerikanu ne’ebé mak transfere hosi SEJD ba FFTL hodi haruka ba orgaun LFTL hodi realiza Liga maibé LFTL gasta la hotu no gasta de’it montante 238.727.34. dólar Amérikanu.
No orsamentu ho montante 71,277.66 orgaun Liga Futeból Timor Leste (LFTL) haruka fila ba SEJD atraveza liu hosi Federsaun Futeból Timor Leste (FFTL), iha loron 10 fulan Maiu tinan 2022. Maibé tuir informasaun orsamentu refere sei belit hela iha FFTL no la fila ba kofre estadu.
Ekipa kobertura JHD
