Dili — Ekipa Ministeru Obras Públika (MOP), susesu halakon nia ekipa adversariu Mua Cau Fc, ho score 4-2, iha Jogu ikus pool (B), Taca FALINTIL Futsal 2022.
Hala’o jogu iha kampu Futsal FFDTL fatuhada Dili sabadu, (20/08), iha inisiu jogu ekipa rua tun kedas ho ambisaun aas hodi produs golu maibé defeza hosi kada ekipa mantein solidu hodi la fó fatin ba malu hodi produs golu ho lais.
Mua Cau Fc, lídera uluk ho score 1-0 hafaoin jogador Martinho Vaz susesu fura rede MOP Fc iha minutu 18.
Ho golu ne’e halo jogu sai manas liu tan hodi lansa kontra no ataka ba malu maibé la iha golu ruma mak akontese to’o termina jogu Primeira parte score mantein 1-0.
Kontinua ba jogu segunda parte ekipa la persija tempu naruk ba ekipa Mua Cau Fc, hodi produs tan golu ida hodi haboot score ba 2-0.
Ekipa MOP foin mak responde golu ida hodi hamihis score ba 2-1 liu hosi jogador, Sonio Guterres, iha minutu 24.
Ho golu ne’e jogu kontinua manas liu tan no ekipa MOP marka tan golu ida hodi halo empata score ba 2-2.
Ho golu ne’e halo ekipa Mua Cau Fc, hahú lakon vontade jogu ho núne’e ekipa MOP aproveita hodi marka tan golu ida hodi lídera hikas score 3-2, liu hosi jogador, Salvador da Silva, iha minutu 37.
Liu de’it minutu 1 ka iha minutu 38, Salvador da Silva, marka tan nia naran hodi haboot score ba 4-2, to’o termina jogu vitoria ba MOP Fc.
Hosi rezultadu vitoria ne’e hatuur ekipa MOP Fc hakat ba 16 besar nu’udar Kampeaun grupu (B) Taca FALINTIL Futsal 2022.
Enkuantu ekipa Mua Cau Fc, elimina hosi Taca FALINTIL Futsal 2022, tanba ekipa B’Tal Fc mak hakat ba 16 besar nu’udar runer-up.
Ekipa kobertura JHD
