DILI–Prezidente Internu klubu Estrela Baguia, Helio Francisco Amaral, optimista no garante sei manán nia ekipa adversariu Ministru Obras Públika (MOP) iha 8 finais Taca FALINTIL Futsal 2022.
Aban kuarta (24/08), Taca FALINTIL Futsal 2022, hahú ona jogu 8 finais iha ne’ebé jogu 8 fianis refere sei loke hosi klubu segunda divizaun Liga Futsal Timor-Leste kontra instituisaun Ministeru Obras Públika (MOP)
Instituisaun MOP ne’ebé mak hakat ba 8 finais Taca FALINTIL Futsal 2022 ne’e ho estatutu nu’udar Kampeaun grupu (B) ne’e tenke hasoru ekipa zigante ida hosi Liga Futsal Timor-Leste segunda divizaun Estrela Baguia Fc, ne’ebé mak hakat ba 8 finais refere ho estatutu nu’udar runer-up iha pool (A) nia.
Iha entervista ho Prezidente interinu AD Estrela Baguia, Helio Fransisco Amaral, hatete, Maske sira nia ekipa Estrela Baguia Fc, hakat ba 8 finais nu’udar runer-up, maibé sira la hakfodak ho nia ekipa adversariu MOP ne’ebé mak hakat ba 8 finais refere nu’udar juara grupu tanba sira konsidera MOP hanesan ekipa foun no sira garante sei manán iha jogu refere.
“Hasoru MOP ami ladún hakfodak tanba sira ekipa foun i sira menus esperiénsia atu kompete ho ami, ami fiar katak ami sei manán sira” dehan Helio Fransisco Amaral ba JHD iha kampu Futsal FFDTL fatuhada Dili, tersa (23/08).
Nia dehan, Iha jogu 40 minutu mak sei determina sira joga la’ós ho individu maibé ekipa i sira fiar katak jogu ekipa sei fó rezultadu di’ak.
“Ami fiar 40 minutu nia laran ami sei manán sira ho score 4-2, 5-2 ou bele mós ami manán sira ho 3-0” dehan Helio ho fiar aan hodi fó preokupasaun.
Enkuantu hosi sorin seluk Treinador, Dinis Suares, rekonese katak Estrela Baguia ekipa zigante ida maibé nia iha ona estrajia hodi trava Estrela Baguia
“Ami rekonese katak ekipa Estrela Baguia mós mai hosi segunda divizaun maibé ami mós iha ona maneira para atu atua sira” dehan Dinis ho kalma.
“La fasil, atu hakat ami la fasil ne’e liki kosar, Ami mós garante katak sei avansa ba 4 finais no” haktuir Dinis ho fiar aan.
Tuir nia, sira nu’udar instituisaun uniku ne’ebé hakat ba 16 besar, tanba ne’e sira agradese no hakat ba 8 finais ne’e nia konsidera nia ekipa mós kompete ho di’ak ne’e mak too iha faze 8 finais.
“Ami hakat liu prosesu lubun mak ami to’o iha ne’e ami nia perparasaun ami nafatin konsitente, ha’u orienta ha’u nia ekipa katak la iha rezerva katak all out ne’ebé atu hasoru se de’it mós ami fight” informa Dinis.
“Ha’u pronto kompete ho ekipa ne’ebé mak Profesional liu ami, ha’u fiar ha’u nia aan i ha’u fiar ha’u nia ekipa to’o iha 16 besar ne’e 40 minutu mak determina ami nia destinu” Dinis aumenta
CharllY Junior
