Díli – Taca FALINTIL 2022 to’o ona klaran, Nomad Fc hanesan klubu ne’ebé foin primeira vez tuir eventu ne’ebé direitamente compete hasoru klubu futsal professional no konsege halo supreza to’o quarto finais.
Nomad Fc, inisia husi sidadaun estranjeiru; Kumar husi Malaysia no Christopher Nortier husi Portugal. Iha 2017 klubu ne’e nu’udár klubu bai-bain ne’ebé halimar bola hodi passa tempu entre kolega no familia iha kampo futsal Timor Lodge.
Tan haree joven barak nunka halimar iha kampo standart futsal, sempre halimar kampo baibain (ho rai) no dalan ninin, maka iha 2018 Kumar ho Chris deside fo opurtunidade ba joven hirak ne’e atu halimar no dezenvolve sira-nia skill kada semana iha kampo futsal Timor Lodge.
“Kali pertama adik adik join tahun 2018, mereka tidak pernah main di lapangan futsal biasa, selalu main di pasir atau jalan saja. Jadi saya sama Chris buat keputusan untuk bagi peluang kepada mereka untuk main di lapangan futsal Timor Lodge”, Kumar hateten via whatsApps iha kinta feira ne’e.
Tempu lao, nain rua haree potensia ne’ebé joven sira iha, nune’e deside hasae tempu treinu husi dala ida por semana sae ba dala tolu por semana. Iha 2020, Nomad Fc partisipa iha kompetisaun Taca Benfica no termina iha terseiru lugar, tuir mai, iha 2021 kontinua partisipa iha FFA Cup iha Benfica ne’ebé konsege okupa segundu lugar.
Ho esperiensia no resultadu diak husi kompetisaun sira uluk, maka 2022 Nomad Fc sai klubu dahuluk mak rejistu iha JHD ba Taca FALINTIL 2022. Iha ne’ebé, sira tama iha grupu A, ho klubu sira hanesan ; AD Estrela Baguia, Quartel General, MACLN.
Iha faze apuramentu, Nomad termina ho pontu 6, husi Manan AD Estrela Baguia 4 – 1, Manan MACLN 10 – 1 no lakon kontra Quartel General 2 – 3.
Iha faze oitavo finais, Nomad Fc konsege hakat liu klubu professional husi segunda liga futsal Timor – Leste, B’Tal liu husi drama penalidade 4 – 3 hafoin iha oras normal empata ho score 1 – 1.
Iha jogu tuir mai, quatro finasi Nomad Fc sei desafia klubu professional Mauputa Fc husi primeira divizaun liga futsal Timor Leste, iha loron sabadu 27/08 iha kampo Kuertel General F-FDTL Fatuhada Dili.
Agora dau-daun Nomad Fc konsege fo oprtunidade ba joven Timoroan lubuk ne’ebé klasfika ba ekipa intimu, mak jogador; Patrick Henrique (Gk), Francisco Marques (Gk), Carlos Pinto (Gk), Peregrino Fatima, Dilcio Gargado Oliveira, Marcos Fernandes, Justino Carmelito, Candido, Pedro M. Mendonca, Elvis Gomes, Algontino Sarmento, Roberto Carlos Moniz, Anito Frento Santos, Nicolan de Jesus, Guerson Xavier Soares, Jetizio Rai Xavier, Joaozinho M. Soares, Joaozinho dos S. Nunes.
Media JHD
