DILI-Confederação Desportu Timor-Leste (CDTL) hasoru malu eis primeiru ministru Mari Alkatiri hodi aprezenta servisu no papel konfederasaun depois tinan 20 no tinan haat mai ne’ebe hakarak dezenvolve area desportivu iha Timor-Leste.
“Ohin Estrutura CDTL foun ne’ebe seidauk to’o tinan ida sira mai hasoru ha’u atu esplika sira nia servisu no papel konfederasaun nian no apoiu saida mak sira presiza ne’ebé ha’u dehan desportu ne’e importante tebes tanba atleta sira hetan medalla barak rai liur no maski labele hetan medalla mos hatudu katak ita mos bele iha area desportivu“, dehan Eis Primeiru Ministru Mari Alkatiri ba jornalista sira iha rezidensia ofisiál Farol, Díli Kuarta (14/09).
Eis Primeiru Ministru, atual sekretariu Jerál partidu FRETILIN ne’e hatete, nia kontribuisaun ba desportu mak nia sei sai porta voz hodi koalia ho ukun nain sira liu-liu governu ne’e prontu atu halo tanba governu presiza investe área desportivu hodi hametin instituisaun tanba desportu ema barak nian ne’ebé investe instituisional hanesan konfederasaun desportu Timor-Leste, federasaun desportivu sira, desportu eskolar no komunitaria.
Iha fatin hanesan prezidente CDTL Macário F. Sanches hatete, sira orgullu no kontente tebes iha oportunidade hasoru malu ho eis primeiru ministru Mari Alkatiri partilla papel konfederasaun ne’ebe kontribui ba dezenvolvimentu desportu iha Timor-Leste.
“Ohin CDTL orgullu no kontente tebes tanba iha oportunidade hasoru malu ho ita nia eks primeiru ministru Mari Alkatiri ne’ebe ami mai partilla informasasaun ne’ebe konfederasaun iha hanesan papel CDTL nian ne’ebe mak atu kontribui ba dezenvolvimentu desportu iha Timor-Leste liu-liu atu fortaleza organizasaun desportivu iha Timor-Leste hahu harii federasaun, asosiasaun no klube sira ne’ebe mak diak“, tenik Macario.
Macário akresenta, sira esplika mos lalaok desportivu depois tinan 20 no hato’o servisu estrutura foun ne’e ba tinan haat mai atu halo saida ne’ebe sira hakarak harii konfederasaun desportivu Timor-Leste depois mandatu remata atu nune’e estrutura tuir mai sistema estabelesidu ona inklui iha sistema ida atu kontrola atleta no eks atleta nasional sira para atu nune’e ukun nain sira presiza dadus ruma konfederasaun disponibiliza dadus para fornese atu nune’e ukun nain sira analiza hodi foti desizaun nesesita ba prestasaun atleta sira Timor-Leste nian.
Nia afirma, sira mos hetan hanoin barak husi eks primeiru ministru ne’e hodi nune’e sira bele mellora tan papel konfederasaun nian hodi harii CDTL diak liu tan ba tinan haat mai.
Ekipa Kobertura
