DILI–Eis Jogador selesaun nasionál Timor Leste, triste tanba Federasaun Futeból Timor-Leste (FFTL) la selu direitu jogador selesaun nasionál Timor Leste, nian to’o fulan 9.
Relasiona diretu jogador selesaun nasionál Timor Leste, ne’ebé mak Federasaun Futeból Timor-Leste budu hela no ladauk fó jogador sira nia direitu ne’ebé mak reprezenta Timor-Leste ba kompete iha eventu internasional sira hanesan Suzuki Cup, AFF, no Sea Games edisaun 31 iha foin lalais ne’e hahú hetan relasaun hosi eis jogador selesaun nasionál Timor Leste.
Siqitu Filipe do Carmo, nu’udar eis jogador selesaun nasionál Timor Leste, deskontente ho jerente FFTL ne’ebé mak la iha kapasidade hodi jere ikus halo jogador sira kontinua sai vitima.
“Ha’u sente triste tanba ita nia alin sira mak ba joga maibé sira nia direitu FFTL la fó fali ida ne’e sai problema boot ida ba ita ninia Futeból liu liu ba FFTL tanba saida mak ate agora sira seidauk selu ita nia alin sira nia osan” Dehan eis jogador selesaun nasionál Timor Leste, Siqitu Filipe do Carmo, ba JHD iha Bidau Santana, sexta (16/09).
“Ha’u sente Triste tanba tuir loloos ne’e labele akontese tan ona, tanba ne’e akontese beibeik ita ko’alia sente atu muda maibé nufin la muda nafatin akontese ona iha pasadu maibé kontinua akontese iha futuru” nia tenik
Nia hatete, Oinsá atu dezenvolve Futeból iha Timor Leste ne’e ba oin se kuandu selesaun nasionál de’it FFTL la selu ona
“Ita nia selesaun nasionál de’it sira la selu ona oinsá mak atu motiva ita nia alin foin sa’e sira atu oferese aan ba joga” nia haktuir.
Tuir nia, situasaun ne’e bele fó impaktu ba foin sa’e sira ne’ebé sai hanesan fini ba jogador sira karik Federsaun kontinua jere hanesan ne’e
Nia parte mós rekonese katak situasaun ne’e mós akontese ona ba sira iha tempu pasadu maibé la hanesan agora sira nian tanba ne’e agora besik to’o tinan ona
“Se FFTL nafatin abandona hanesan ne’e ami nu’udar eis jogador selesaun nasionál ami apoiu ba selesaun nasionál hodi lori kazu ne’e to’o iha FIFA mós pronto” nia hatete.
Nia haktuir, sira hatete lori Futeból ba Munisipiu serake agora selesaun nasionál ida reprezenta Timor-Leste ba rai li’ur de’it la selu ona oinsá bele lori Futeból to’o Munisipiu
“Ami nu’udar eis selesaun nasional husu ba FFTL atu rezolve lalais direitu jogador sira labele dada naruk problema ne’e” nia hakotu.
CharllY Junior
