DILI- Governu Timor-Leste liuhusi Sekretáriu Estadu Juventude Desportu (SEJD), servisu hamutuk ho Kooperasaun Internasionál Koreia (KOICA) kapasita joven hamautuk na’in 23 hodi sai treinadór kona-ba area desportu iha Timor-Leste.
Antes ne’e, fo ona formasaun ba treinadór na’in 20, agora kontinua tan ba dala-2 nian mak hamutuk 23.
Reprezentante Sekretáriu Estadu Juventude no Desportu (SEJD) Diretór Jerál, David Tomas de Deus, hateten ohin abertura ba segundu formasaun Coaching Training ba treinadór sira, liuhusi KOICA halo ona selesaun hili sira na’in 23 mak tuir treinamentu durante semana ida hodi sai treinadór.
“Intensaun husi formasaun ne’e ita fó treinu ba treinadór sira ne’ebé ho koinesimentu ne’ebé ho pozitivu atu nune’e bele kontinua apoiu Governu, apoiu federasaun no apoiu dezenvolvimentu espesifiku ba Futeból Juvenil ba ita nia labarik sira iha Timor Leste,” David hateten iha salaun Luz Clarita Bidau Lecidere, Segunda (19/09).
Nia afirma, ida ne’e inisiativa Governu TL liuhosi SEJD halo kooperasaun ho parseiru desenvolvimentu KOICA hodi kapasita joven sira, la’os fo formasaun de’it maibé fo apoiu infraestrutura liuliu area desportu nian.
Portantu formasaun ne’e foka liuba area 6 mak oinsá sira kompriende kona-ba labarik ho direitu ba labarik sira nian, teoria kona-ba formasaun ba joven sira, oinsá timbili ho komunikasaun nian, aspeitu jender area desportu nian, prinsípiu husi nutrisaun, ida ne’e importante ba treinadór sira no mos alin sira iha rai laran.
Iha sorin seluk Field Manajer Kooperasaun Internasionál Koreia (KOICA), MinYoung Lee, hatutan, KOICA kontinua fo treinamentu ba treinadór sira hodi prepara ba tinan ida ne’e ida ba dala rua nian.
“Treinadór sira ne’e mos tenke hatene no fokus parte hothotu la’os joga bola de’it, agora ami halo selesaun ba treinadór sira hamutuk 23 ne’e, kompostu feto na’in 6, mane 17 mak liuhusi selesaun hodi tuir treinamentu formasaun ne’e”, MinYoung Lee dehan.
Nia salienta, Timoroan barak mak gosta desportu hanesan joga bola, sira mós hakarak aprende maibé dalaruma treinadór mak ladun di’ak tanba ne’e sira presiza aprende tan hodi aumenta konesimentu.
Caet
