DILI– Relasiona ho pedidu karta renjignasaun ne’ebé Prezidenti Liga Futeból Timor-Leste (LFTL), Nilton Telmo Gusmao Santos submete ba asembleia jerál LFTL ne’e, Governo liu hosi Sekretariu Estadu Juventude no Desportu (SEJD), lideradu hosi Abrao Nokosiku Saldanha, la perkupa ho renjignasaun hosi Prezidenti Liga nian ne’e no konsidera Futeból sei la mate.
Iha loron 15 fulan-Setembru ne’e, Prezidenti LFTL Nilton Gusmao dirije ona karta ida diretamente bá Prezidente Asembleia Jerál LFTL, Miguel Manitelo no koñesimentu bá mós Sekretáriu Estadu Juventude no Desportu (SEJD), Abrão Saldanha ho Prezidente Federasaun Futeból Timor Leste (FFTL), Francisco Jerónimo, no iha karta ne’e Nilton Gusmao hatete atu rejigna aan hosi kargu Prezidenti LFTL.
Relasiona ho karta renjignasaun hosi Prezidenti Liga nian ne’e Sekretariu Estadu Juventude no Desportu Abrao Nokosiku Saldanha konsidera sei la fó impaktu ba Futeból iha Timor Leste.
“Ha’u hetan ona surat kopia ida husi Nilton Gusmao kona-ba nia resignasaun husi prezidente liga futebol Timor Leste, ha’u hanoin sei Ia fo impaktu ba Liga tanba orgaun Liga eziste tiha ona”, afirma SEJD Abrao Saldanha ba Jornalista hafoin abertura jogu Juvenil iha kampu futebol demokrasia, segunda (19/09/2022).
Governante ne’e haktuir, karta husi Nilto Gusmao aprezenta ho razaun katak nia laiha espasu ida hodi didika aan tomak ba liga, tanba ne’e nia husu ema balun hodi subtitui hikas nia kargu.
“Ne’e laiha implikasaun ba Liga, hanesan ita hotu haree ba preparasaun ne’ebe la’o di’ak no mos estrutura iha maibé prezidente mak husu atu resigna aan” informa Abrao.
“Problema ida ne’e kompetensia tomak prezidenti asembleia jeral LFTL nian oinsá mak bele hetan fali prezidenti foun hodi lidera hikas liga Timorense” nia afirma.
“Orgaun liga ne’e harii hanesan entidade privadu ida ne’ebe gosta goza dereitu personalidade juridiku ba sira nia asosiadu hili liu husi sira nia kongresu”, katak nia.
Abrao afirma, ne’e hanesan dereitu esklusivu ema ida idak nian, ne’e duni kazu prezidenti liga nian ne’e laiha forsa iha Timor atu husu nia tama fila fali ne’e dereitu privadu.
Tuir informasaun ne’ebé mak JHD asesu hosi fontes oin-oin katak tuir loloos enkotru asembleia jerál LFTL nian ne’e atu hala’o iha segunda loron (19/09) foin lalais maibé asembleia jerál adia hikas ba loron (22/09) tinan ne’e.
Enteretantu Nilton Gusmao rasik hahú lídera LFTL desde tinan 2015 wainhira sei LFTL sei naran Liga Futeból Amadora (LFA) no iha tinan 2020 liu husi kongresu dahuluk LFA tranforma ba Liga Futeból Timor-Leste (LFTL).
No iha kongresu ne’e Nilton Gusmão re-eleitu nu’udár prezidente LFA ne’ebé transforma bá LFTL iha loron 15 fulan-Agostu 2020 bá períodu 2020-2023 ho votu afavór 32, kontra zero (0) no abstensaun mós zero (0).
Caet
