DILI- Sekretáriu Jerál Assosiasaun Futsal Timor Leste (AFTL), Fernando Baptista Xavier, informa, fulan Novembru tinan ida ne’e AFTL prontu realiza liga futsal époka tinan ida ne’e.
Tuir nia, objetivu husi enkontru ne’e atu preparasaun ba liga futsal Timor Leste époka tinan ida ne’e.
“Novembru ita sei realiza liga futsal époka 2022, tanba ne’e mak ohin ita konvoka reniuan ho klube sira”, deklara Sekretáriu Jerál AFTL, Fernando Baptista Xavier ba Jornalista hafoin remata ekontru ho klube sira iha salaun Xanana Sport Center, Kinta (22/09/2022).
Fernando esplika, klube ne’ebé mak partisipa iha pra-liga hamutuk 24, primeiru divizaun 10 ho segundu divizaun 14.
Xavier informa, Segunda-feira 26 Setembru ne’e AFTL hahú loke janela transferensia ba klube sira no sei taka iha loron 26 fulan Outubru tinan ne’e.
Nia dehan, normalmente loke janela transferensia ba klube ne’ebé mak antes ne’e partisipa iha pra-liga.
Sekretáriu jerál AFTL nia parte husu klube ne’ebé mak seidauk kompleta dokumentu tenke kompleta, karik la kompleta sei la partisipa iha eventu refere.
Fernando afirma, iha klube lima mak seidauk kompleta dokumentu mak hanesan, Coelho Fc, Gamer Fc, Samoro Fc, Bas Fc no AD Estrela Baguia.
“Kona-ba preparasaun ami prepara hela entermu rekursu umanu, tanba ita hetan autorizasaun hosi parte kompetente sira katak ita bele la’o ona no AFTL prontu ona”, katak nia.
Fernando argumenta, AFTL hanesan membru ba Federasaun Futebol Timor Leste (FFTL), tanba ne’e fundus maioria mai husi ne’eba, FFTL mós garantia entaun liga futsal bele la’o ona.
Nia dehan, orariu fiksu ona iha fulan Novembru no utiliza kampu futsal F-FDTL ho jinájiu desportivu Dili nian.
Iha fatin hanesan prezidente Musilah Fc, Aking Ung, sente kontente no apresia ho esforsu AFTL nian hodi realiza liga futsal maski tinan ne’e besik hotu ona.
“Hanesan klube sente kontenti tanba tinan 2022 besik hotu ona AFTL sei realiza liga futsal ba tinan ida ne’e”, tenik nia.
Reprezentante ne’e hateten, rezultadu husi enkontru ne’e positivu tebes klube hotu-hotu kontribui hodi lori futsal Timor ba oin.
Caet
