DILI– Prezidente klubu Ramelau Fc, Borja Antonino hatete Ramelau Fc Konfiante sei halakon Mushila Fc iha jogu final Taca AFAMA no femenina F-FDTL 2022.
Jogu entre ekipa zigante rua ne’e sei hala’o iha kampu futsal F-FDTL fatuhada Dili sabadu (05/11).
Klubu Kampeaun Pra Liga Futsal Timor Leste Ramelau Fc hakat ba final hafoin manan Gamer Fc ho score 4-1 iha meias finais.
Hosi Sorin seluk ekipa Mushila Fc hakat ba final ne’e hafoin manan nia ekipa adversariu Caesar Dante ho score 3-2 iha drama penalidade.
Ramelau Fc nuudar kampeaun Pra Liga Futsal Timor Leste Epoka 2020-2021, no Ramelau Fc mos reprezenta ona Timor Leste hodi kompete iha AFF futsal CUP 2022 iha Thailand. Maske nunee Iha Pra Liga Futsal Timor Leste Ramelau Fc derota ho Mushila Fc ho score 3-0.
Iha intervista ho prezidente klubu Ramelau Fc Borja Antonino, hatete, sira respeita Mushila Fc nuudar ekipa forte.
“Musilha, ami respeita hanesan klubu ida forte, alende partisipante iha Liga Divisaun Primeira, ami mos lakon ho sira iha Pra Liga” dehan Prezidente klubu Ramelau Fc Borja Antonino ba JHD via WhatsApp Kinta (03/11).
“Derrota iha Pra Liga nian nee sai sasukat atu ami hadia aan no prepara diak liu tan, no ami mos iha konfiansa atu sai kampiaun maske sei la fasil” Borja haktuir.
Nia dehan, Preparasaun Ramelau Fc nian desde kedas inisiu kompetisaun sira preparadu atu enfrenta kualker ekipa iha kompetisaun ne’e.
“Ami konfiante atu manan jogu, e ao mesmu tempu anima amantes Futsal sira nebe ba asisti jogu final ho jogu ne’ebe furak” tenik nia
“Ami nia prioridade maka hetan vitoria ba Jogu aban nian, kona ba skore ami la tau importansia” Nia hakotu.
Hosi Sorin seluk Sekretariu jeral klubu Mushila Fc Aqing Ung (PK), hatete, Mushila Fc sei la hakfodak ho Ramelau Fc tanba iha Pra Liga Ramelau Fc Liu deit pontus 3 ba Mushila.
“Sira ho ami diferensia deit pontus 3 iha liga e sira mos lakon ho ami iha pra liga ne’e duni ami ladun hakfodak ho Ramelau Fc” dehan PK ho fiar aan.
“Ramelau sei la haluha ho derota ne’ebe sira infrenta ho Mushila iha Pra Liga Futsal tinan kotuk no ami sei mantein ami nia vitoria iha Taca AFAMA 2022 Ida ne’e, klaru 100% ami sei manan” Nia komenta.
Head to Head : Ramelau Fc 0-3 Mushila Fc
Jogu 6 ikus husi Ramelau Fc
Ramelau Fc 4-1 Gamer Fc, Ramelau Fc 3-0 Saralima Fc, Ramelau Fc 1- 0 Boa Sorte Fc, Nakadah Fc 1-5 Ramelau Fc, Ramelau Fc 3-0 Lafaek Fc, Ramelau Fc 4-0 M-VDL
Jogu 6 ikus husi Mushila Fc
Mushila Fc 2-2 Caesar Dante (pen 3-2) , Mushila Fc 1-1 Mauputar Fc (pen 2-0), Mushila Fc 2-1 Maudoko Fc, Repal Fc 4-8 Mushila Fc, Mushila Fc 11-0 S. D. B. Benifika, Mushila 1-0 Becusse United
CharllY Junior
