DILI– Ekipa femenina Buset Fc susesu sai kampeaun ba Taca Asosiasaun Ami Familia Militar Asuwain (AFAMA) no Femenina Falintil Forsa Defeza Timor Leste (F-FDTL), hafoin halakon Maudoko Fc ho score 2-1 iha final. Golu Vitoria hosi Buset Fc produs hosi jogador Virginia Branco.
Jogu final Taca AFAMA no femenina F-FDTL 2022 ne’e hala’o iha kampu futsal F-FDTL Fatuhada Dili Sabadu (05/11).
Iha inisiu jogu Primera parte Ekipa rua lansa kedas kontra atake ba malu hodi buka oportunidade hodi hatama golu maibe guarda defensivu hosi kada ekipa mantein linha metin hodi la fo fatin malu hodi bele produs golu ho lalais.
Maibe Tama ba iha minutu 15 Buset Fc susesu lidera kedas ho score 1-0 hafoin jogador Virginia Branco produs golu ida ba rede Maudoko Fc no score ne’e mos mantein too termina jogu Primera parte.
Kontinua ba jogu segunda parte ekipa rua mantein lansa kontra atake ba malu hodi buka oportunidade hodi bele produs golu ho nunee Tama ba iha minutu 25 Buset Fc haboot hikas score ba 2-0 Liu hosi jogador Virginia Branco.
Ho golu ne’e jogu sa’i manas liu tan ho nunee Tama ba iha minutu 30 Vanessa Fernandes Marka golu ida hodi hamihis score ba 2-1 ho score refere Mantein to’o termina jogu segunda parte Vitoria ba Buset Fc.
Enkuantu premiu ba manan nain Primeru lugar mak Taca Ida ho total osan hamutuk 1.200 USD
No ekipa Maudoko Ladies ne’ebe okupa iha segundu lugar hetan premiu Taca ho osan montante 800 USD.
Ekipa AD Estrela Baguia ne’ebe mak sei terseru lugar hetan premiu Taxa Ida ho osan montante 600 USD.
Kuartu lugar ba Taca AFAMA no Femenina F-FDTL 2022 monu ba ekipa Tequila Treze ho nunee hetan premiu Taxa Ida Osan montante 450 USD.
Mellor markador ba Taca AFAMA no Femenina F-FDTL 2022 monu ba jogador Anysia Widiawati ho golu 11 ho nunee iha diretu atu hetan premiu Osan montante 150 USD
No Mellor Jogador monu ba jogador Dolores V. Da S. Costa ho votus 820.
Entertantu Total ekipa femenina ne’ebe mak partisipa iha Taca AFAMA no femenina F-FDTL 2022 ne’e hamutuk 13.
CharllY Junior
