DILI–Konfederasaun Desportu Timor Leste (CDTL), sei realiza simpojiu nasional desportu ne’ebe mak ho tema, desportu iha pasadu, prezente no futuru.
Lia hirak ne’e hato’o husi Vise Prezidente CDTL, Zeferino Viegas ba Jornalista liu husi Komfrensia Imprensa iha CDTL, Dili, Kuarta, (16/11).
“CDTL Sesta feira sei realiza atividade ida hanaran simpojiu nasional Desportu 2022, tema Jeral husi simpojiu nasional Desportu mak Desportu Pasadu, Prezente no futuru, tenik nia.
Nia dehan, iha simpojiu nasional Desportu orador prinsipal mak Eis Primeiru Ministru Mari Alkatiri, membru paynel Nain haat sei hariku diskusaun ne’e.
Membru Nain haat mak hanesan, Eis Sekretariu Estadu SEPAC, Ozorio Florindo, Eis Sekretariu Estadu Juventude no Desportu , Miguel Manetelu, Eis Prezidente CDTL, Afranio Xavier Amaral, no Eis Ministru Negosiu Estranjeiru, Aurelio Cristovao Guterres, sira mai ho asuntu ida idak nian.
Nia dehan CDTL sei rekomenda pontu importante sira liga ba simpojiu nasional Desportu ne’e.
“Nunee iha simpojiu no panyel nia rohan ita sei hetan konkluzaun husi governu neebe tutela ba desportu hato’o mos ba partidu politiku hirak ne’ebe sei kompete iha eleisaun parlamentar 2023 nian nune’e sira forma governu tenke tau atensaun husi asuntu hirak ne’e“, dehan nia.
Nia dehan, atividade ne’e CDTL ninian hanesan atividade penultima 2022 nian, tanba Dezembru sei iha asembleia anual.
Vise Prezidente CDTL esplika, objetivu prinsipal hanesan hotu hotu hatene katak, durante desportu iha abstakulu barak liuliu liga ba prestasaun.
Nia hatutan, atividade simpojiu nasional Desportu sei partisipa hosi orador sira, membru paynel, Reprezenta governu liu husi Sekretariu Estadu Juventude no Desportu, Diretor Jeral SEJD sira, embaisador balun liga ba area desportu no mos federasaun desportu sira ne’ebe hamahan aan iha CDTL.
Caet
