DILI—Ohin kinta (17/11) orgaun Liga Futebol Timor-Leste (LFTL) ofisialmete loke ona janela transferensia ba jogador nasional no internasional hodi nune’e klube sira husi Primera no segunda divizaun Liga Timorense epoka 2022-2023 bele halo rejistrasaun jogador sira
“Liga futebol kuaze besik tinan ona la iha atividade ne’ebe ikus orgaun LFTL rona ona desizaun husi SEJD no FFTL kona ba transferensia orsamentu liga tinan 2022 nian ami nu’udar orgaun implementador liga futebol regular kada tinan ne’ebe ami hakarak hato’o ofisialmente ba klube divizaun dahuluk no daruak Liga futebol Timor-Leste katak kompetisaun Liga Timorense epoka 2022-2023 loke ona janela transferensia ba jogador nasional no internasional komesa loron 17 fulan Novembru 2022 remata iha loron 10 fulan Dezembru 2022”, Diretor Relasaun Publiku Diogo N. Fraga ba jornalista liu husi konferensia imprensa iha edifisiu LFTL Merkadu Lama.
Diretor hatutan, fatin rejistrasaun sei hala’o iha edifisiu LFTL iha Estadium Munisipal Dili husi oras 08:00 dader to’o 17:00 loraik liu husi diresaun verifikasaun no rejistu tan ne’e husu ba klube divizaun dahuluk no daruak sira bele mai halo ona rejistrasaun no halo aplikasaun dadus jogador sira nian.
Nia informa, LFTL mos prevee daudauk ona kalendariu para atu prense rekezitu ba Liga Timorense epoka 2022-2023 ne’ebe sistema jogu sei utiliza metade kompetisaun no jogu kick off ba divizaun dahuluk Liga Timorense epoka 2022-2023 iha loron 16 fulan Dezembru 2022 no jogu kick off divizaun daruak Liga Timorense epoka 2022-2023 iha loron 21 fulan Dezembru 2022 bainhira iha prosesu rejistrasaun klube sira hotu ona tuir data rejistu ne’ebe determinadu ona no kampu ne’ebe utiliza hodi realiza jogu ne’e mak Estadium Munisipal Dili deit no jogu husi divizaun dahuluk no daruak hamutuk 36 tanba liga la’o metade kompetisaun.
Diogo informa, LFTL seidauk fo informasaun formal ba klube sira hotu maibe informal iha ona no liu husi konferensia imprensa ne’e ofisialmente anunsiu ba klube sira hotu atu mai halo rejistrasaun jogador sira
ADS
