DILI – S’Amuser Fc susesu sai kampeaun ba Taxa Rosa Muki Bonaparte 2022, hafoin halakon nia ekipa adversariu AD SLB Laulara ho score 3-1 iha jogu final mak hala’o iha kampu demokrasia formoza Dili, Sabadu (10/12).
Iha inisiu jogu ekipa rua hotu hotu tun ho ambisaun hodi buka atu hatama golu liu hosi kontra atake ba malu ho nunee tama ba iha minutu 13 AD SLB ukun kedas ho score 1-0 liu hosi jogador Natalia da Costa.
Golu ne’e akontese hafoin arbitu deside penalti ba AD SLB tanba defeza hosi S’Amuser Fc komete erru iha area grandeal. No Natalia da Costa ne’ebe mak sa’i ezekutor ba penalti refere susesu hala’o nia serbisu ho Diak hodi lori nia ekipa lidera uluk ho score 1-0.
Maske nunee rezultadu ne’e la dura ho tempu naruk tanba hafoin tama ba iha minutu 20 S’Amuser Fc responde hikas liu hosi jogador Leticia do Rego hodi muda score ba 1-1. Ho score refere halo jogu sa’i manas liu tan hodi halo kontra ataka ba malu to’o oras Primera parte termina.
Kontinua ba jogu segunda parte jogu lao kedas ho ritmu ne’ebe makaas hodi lansa kontra atake ba malu ho nunee tama ba iha minutu 55 S’Amuser produs tan golu ida hodi lidera hikas ho score 2-1, liu hosi jogador Dolores V da S. Costa. Avansadu ho numeru kamizola 7 ne’e Marka golu liu hosi suta dook.
Ho score refere jogu kontinua manas liu tan ekipa AD SLB ne’ebe mak sofre ona golu ida tenta atu halo kontra atake makas ho nunee bola monu tanba Leticia do Rego hodi halai Tama ba area grandeal AD SLB nian ho nunee Defeza hosi AD SLB komete erru ikus mai arbitu deside penalti ba S’Amuser Fc.
Dolores V. da S Costa ne’ebe mak sa’i ezekutor ba penalti refere susesu hala’o nia serbisu ho Diak hodi haboot liu tan rezultadu ba 3-1, iha minutu 65.
Ho score ne’e tensi jogu komesa sae makas liu tan maibe la iha tan golu ruma mak akontese to’o termina jogu segunda parte Vitoria ba S’Amuser Fc ho score 3-1
Ho Vitoria ne’e ekipa S’Amuser Fc hadau ona titulu kampeaun hosi AD SLB ne’ebe mak antes ne’e foti iha epoka 2021.
Entertantu premiu ba kampeaun Taxa Rosa Muki Bonaparte ne’e hamutuk 5.000 dolar Amerikanu.
Enkuantu ekipa AD SLB ne’ebe mak okupa iha segundu lugar iha diretu hodi hetan premiu ho montante 3000
Maranatha Fc ne’ebe mak okupa terseiru lugar iha diretu atu hetan premiu 2000 no unital Fc ne’ebe mak okupa iha kuartu lugar hetan premiu osan ho montante 1000
CharllY Junior
