DILI– Aitana Fc susesu rekoila pontus tolu (3) kontra nia ekipa adversariu Fc Porto Taibesse hafoin manan ho score 2-1 iha jogu abertura Liga Timorense epoka 2022-2023.
Hala’o Jogu iha Estadion Munisipal Dili, sexta (17/02), ne’e iha inisiu jogu ekipa rua tun kedas ho ambisaun aas hodi buka oportunidade atu marka golu.
Jogu foin hala’o deit minutu 1 adeptus Aitana Fc haklalak kedas hafoin jogador Jilson dos Reis susesu fura rede Fc Port0 liu hosi suta livre hodi muda score ba 1-0.
Ho golu ne’e jogu sa’i manas liu tan ba ekipa rua hodi lansa kontra atake ba malu ho nune’e tama ba iha minutu 23 ekipa Fc Porto Taibesse konsege responde hikas golu ida liu hosi jogador Lazio Piedade maibe arbitu anula hikas tanba jogador refere iha ona pozisaun offside.
Porto Taibesse ne’ebe mak sofre uluk golu ida konsege domina hikas bolu hodi buka oportunidade hodi responde golu liu hosi kontra atake maibe guarda Defeza hosi ekipa Aitana Fc nafatin la fo fatin ba ekipa Fc Porto hodi marka golu too termina jogu primeira parte score mantein 1-0.
Kontinua ba jogu segunda parte ekipa rua mantein lansa kontra atake ba malu liu hosi tekniku no tatiku ida idak nian maibe ekipa Fc Porto Taibesse ne’ebe mak domina liu jogu konsege marka golu ida responde score ba 1-1, liu suta penalti.
Fc Porto Taibesse hetan penalti refere hafoin linha defensivu hosi Porto Taibesse komete erru iha area grandeal ho nune’e arbitu deside kedas penalti ba Porto Taibesse, no Edencio Da Costa ne’ebe mak sa’i ezekutor ba penalidade refere susesu fura rede Aitana Fc.
Ho score refere jogu sa’i manas liu tan ba ekipa rua hodi lansa kontra atake ba malu ho nune’e tama ba iha minutu 88 ekipa Aitana Fc produs tan golu ida hodi hasae score ba 2-1 liu hosi jogador Mamoudou Conde.
Jogador nasionalidade Kenya ne’e susesu marka golu hafoin hetan asistensia bola kruza hosi nia kompatriota.
Ho golu ne’e jogu sa’i manas liu tan ho nune’e tama ba iha minutu 90 Aitana Fc tenke joga deit ho jogador nain 10 hafoin guarda rede Aitana Fc hetan Kartaun mean maske nune’e rezultadu la muda no mantein to’o termina jogu segunda parte vitoria ba Aitana Fc ho score 2-1.
Hosi rezultadu vitoria ne’e lori ekipa Aitana Fc okupa iha primeru klasifikasaun provizoriu ho pontus tolu
Enkuantu ekipa Fc Porto Taibesse iha pozisaun ikus ho pontus 0.
Enkuantu aban sei iha jogu entre Atletico Ultramar/ Coracao Fc sei hasoru Karketu Dili Fc.
CharllY Junior
