DILI– Klubu promovidu Atletico Ultramar/Coracao Fc, susesu halo supreza ba nia ekipa adversariu Karketu Dili Fc, hafoin manan ho score 2-1, iha Jornada dahuluk Liga Timorense primeira divizaun epoka 2022-2023.
Supreza ne’e akontese iha Estadion Munisipal Dili sabadu (18/02) ekipa Ultramar Coracao Fc ne’ebe mak nu’udar ekipa uma nain tun kedas ho ambisaun aas hodi lansa kontra atake ho nune’e jogu foin hala’o deit minutu 4 ekipa Ultramar/ Coracao Fc halo kedas supreza ba Armada Matak Malirin liu hosi jogador Pascoal Fernandes hodi muda kedas score ba 1-0.
Ho golu sedu hosi ekipa Ultramar/Coracao Fc ne’e halo ekipa Karketu Dili Fc tenta atu sa’i hodi halo atake ba ekipa Coracao Fc maibe guarda no defensivu la fo fatin ba ekipa Karketu.
Maibe to’o iha minutu 45+3 esforsu ne’ebe mak armada matak malirin ne’e halo konsege rezulta golu hodi hatuur score ba 1-1, liu hosi jogador Galvanio Alberto.
Avansadu ho numeru kamizola 10 ne’e marka golu hafoin simu asistensia bola kruza hosi nia kompatriota Olegario Boavida ho rezultadu 1-1 ne’e mantein to’o oras priemeira parte termina.
Kontinua ba segunda parte jogu sa’i manas liu tan ba ekipa rua hodi lansa kontra atake ba malu maibe sorti diak monu ba ekipa Coracao Fc hodi fura tan rede Karketu Dili Fc liu hosi jogador Romulo Escurial iha minutu 85.
Jogador ho numeru kamizola 13 ne’e marka golu hafoin simu asistensia bola kantu hosi nia kompatriota Ramos. Ho nune’e score muda aan ba 2-1.
Ho golu ne’e jogu sa’i manas liu tan ba ekipa rua hodi lansa kontra atake ba malu maibe la iha tan golu ruma mak akontese to’o termina jogu segunda parte vitoria ba Atletico Ultramar di Fc, Ho score 2-1.
Hosi rezultadu vitoria ne’e nuudar supreza ida tanba ekipa Atletico Ultramar/ Coracao Fc ne’e foin mak promovidu ba primeru divizaun iha Liga Timorense epoka 2021.
Enkuantu ekipa Karketu Dili Fc nuudar ekipa zigante hosi primeira divizaun Liga Timorense tanba klubu ne’ebe mak identiku ho naran Matak Malirin ne’e ekipa ida ne’ebe mak sa’i kampeaun ba Liga Timorense epoka 2021.
Alsino da Costa
