DILI– Santa Cruz Fc sofre derota ho nia adversariu As Marca ho score 1-0, iha jogu dahuluk kompetisaun Liga Timorense Segunda divizaun epoka 2022-2023.
Jogu entre ekipa rua ne’e hala’o iha Estadion Munisipal Dili, kinta (23/02) iha inisiu jogu ekipa rua ne’e hotu hotu tun ho ambisaun boot hodi buka oportunidade hodi bele marka golu liu hosi kontra atake ba malu.
Maibe esforsu ne’ebe mak avansadu hosi ekipa rua halo seidauk bele rezulta golu tanba guarda defensivu mantein ho linha metin ho nune’e to’o termina jogu primeira parte score mantein okulista 0-0.
Kontinua ba jogu segunda parte Ekipa As Marca halo substituisaun ba jogador hodi halo mudansa ba tatika no esforsu ne’e konsege lori ekipa As Marca lidera ho score 1-0.
Hafoin jogador Ivan Jose fura rede Santa Cruz iha minutu 62, futebolista ho numeru kamizola 22 ne’e matka golu hafoin hetan bola barulu iha area grandeal santa Cruz nian.
Ho golu ne’e hasae liu tan tensi jogu entre ekipa rua ne’e maibe la iha tan golu ruma mak akontese to’o termina jogu segunda parte vitoria ba As Marca ho 1-0.
Rezultadu vitoria ne’e hatur ekipa As Marca ukun provizoriu ho pontus tolu 3 hosi jogu dala ida.
Enkuantu ekipa Santa Cruz ne’ebe mak sofre derota obrigado tenke okupa iha pozisaun ikus liu ka pozisaun 8.
DVO
