DILI– Kablaki Fc susesu rekoila pontus tolu (3), iha jogu dahuluk segundu divizaun Liga Timorense epoka 2022-2023, hafoin halakon nia adversariu Nagardjo Fc ho score 1-0. Golu vitoria hosi Kablaki Fc ne’e marka hosi Juvito Nacimento.
Jogu entre ekipa rua ne’e hala’o iha Estadion Munisipal Dili, sexta (24/02), iha inisiu jogu primeira parte ekipa rua tun kedas ho intensidade ne’ebe aas hosi ekipa rua hodi mantein domina bola hodi buka oportunidade hodi bele produs golu.
Nagardjo Fc ne’ebe mak domina liu bola konsege halo peresaun makas ba ekipa Kablaki Fc, maibe guarda no defensivu hosi Kablaki Fc mantein linha metin hodi la fo fatin ba ekipa adversariu hodi bele produs golu ho nune’e to’o termina jogu primeira parte score mantein okulista 0-0.
Kontinua ba jogu segunda parte Ekipa rua tun mantein ho sira nia estratejia ida idak hodi halo kontra atake ba malu.
No tama ba iha minutu 68 Juvito Nacimento, susesu fura rede Nagardjo Fc hodi muda score ba 1-0.
Ho score refere halo jogu komesa manas ba ekipa rua hodi lansa kontra atake ba malu no ekipa Nagardjo ne’ebe mak hola imisiativa halo peresaun hodi halo balansu ba jogu maibe defeza hosi adversariu mantein disiplina hodi la fo fatin ba ekipa Nagardjo hodi marka golu ho nune’e to’o termina jogu segunda parte vitoria ba Kablaki Fc ho score 1-0.
Hosi rezultadu vitoria ne’e lori ekipa reprezentante munispiu Manufahi konkista pontus tolu dahuluk hanesan ho As Marca ne’ebe antes ne’e mos manan nia adversariu ho score 1-0.
DVO
