DILI– DIT Fc susesu rekoila pontus tolu (3) hafoin halakon nia adversariu Zebra Fc ho score 2-1, iha jogu kontinuasaun Liga Timorense Segunda divizaun jornada dahuluk ba epoka 2022-2023.
Hala’o jogu iha stadion Munisipal Dili, sabadu (25/02), iha inisiu jogu ekipa rua tun kedas jogu ho tensi ne’ebe mak aas.
Maibe ekipa DIT Fc ne’ebe hatudu jogu furak konsege produs golu ho lais liu hosi jogador Boaventura Seran Kalau iha minutu 1.
Futebolista ho numeru kamizola 44 ne’e marka golu hafoin hetan bola barulu iha area grandeal Zebra Fc hodi fura rede Zebra no muda kedas score sa’i 1-0.
Ho golu sedu ne’e halo jogu komesa sa’i manas liu tan ba ekipa rua ne’e hodi lansa kontra atake ba malu ho nune’e tama ba iha minutu 12 DIT Fc haboot liu tan score ba 2-0, liu hosi jogador Lamberto Ximenes.
Ho golu ne’e tensi jogu sa’i manas liu tan ba ekipa rua ne’e hodi lansa kontra atake ba malu maibe to’o termina jogu primeira parte score mantein 2-0.
Kontinua ba jogu segunda parte ekipa Zebra Fc halo kedas substituisaun ba jogador hodi mudansa ba tatika no mudansa refere konsege hatudu rezultadu pozitivu hafoin tama ba iha minutu 56 Zebra Fc konsege responde golu ida hodi hamihis score ba 2-1, liu hosi jogador Helio Ribeiro.
Avansadu ho numeru kamizola 11 ne’e produs golu hafoin hetan bola barulu iha area grandeal DIT Fc.
Ho score refere intensidade jogu sa’i manas liu tan ba ekipa rua ne’e hodi lansa kontra atake ba ba malu maibe la iha tan golu ruma mak akontese to’o termina jogu segunda parte vitoria ba DIT Fc ho score 2-1.
Ho rezultadu vitoria ne’e hatuur ekipa DIT Fc okupa iha primeru klasifikasaun provizoriu tabela Liga Timorense Segunda divizaun ho pontus tolu.
DVO
