DILI — Fiel Fc susesu rekoila pontus tolu hafoin tidin nia adversariu Lica-Lica Lemorai Fc ho score 2-0. Hosi rezultadu vitoria ne’e hatuur Fiel Fc ukun provizoriu tabela klasifikasaun Segunda divizaun Liga Timorense epoka 2022-2023.
Jogu entre ekipa rua ne’e hala’o iha Estadion Munisipal Dili, domingu (26/02), iha inisiu jogu ekipa rua ne’e hotu hotu hatudu jogu furak liu hosi tekniku no tatiku hosi kada ekipa.
Maibe ekipa Lica-Lica Lemorai Fc ne’ebe mak hatudu jogu furak konsege dimana liu bola hodi lansa suta fila fila ba rede Fiel Fc maibe seidauk bele rezulta golu.
Enkuantu ekipa Fiel Fc ne’ebe mak ladun hetan bola laos la iha oportunidade maibe ekipa refere halo kontra atake ne’ebe makaas hodi halo peresaun ba Lica-Lica Lemorai Fc maibe to’o termina jogu primeira parte score mantein 0-0.
Kontinua ba jogu segunda parte ekipa rua mantein lansa kontra atake ba malu ho ritmu jogu ne’ebe makaas hodi buka oportunidade atu bele produs golu maibe ekipa Fiel Fc ne’ebe mak halo mudansa ba tatika liu hosi substituisaun jogador konsege produs golu ida liu hosi jogador Pedro Sanches hodi muda score ba 1-0 iha minutu 50.
Jogador ho numeru kamizola 28 ne’e marka golu liu hosi suta penalidade, Fiel Fc hetan oportunidade ba penalidade hafoin akontese bola mão iha area grandeal Lica-Lica Lemorai Fc nian.
Ho score refere jogu sa’i manas liu tan ba ekipa rua ne’e hodi lansa kontra atake ba ba malu no tama ba iha minutu 90 Fiel Fc haboot liu tan score ba 2-0 liu hosi jogador Avellino Gama.
Ho score refere mantein to’o termina jogu segunda parte vitoria ba Fiel Fc, hosi rezultadu vitoria ne’e hatuur Fiel Fc okupa provizoriu iha tabela klasifikasaun Segunda divizaun Liga Timorense epoka 2022-2023.
DVO
