DILI– Academica Fc susesu rekoila pontus tolu kompletu hafoin harahun nia adversariu Aitana Fc, iha jogu kontinuasaun primeira divizaun Liga Timorense epoka 2022-2023. Rezultadu vitoria ne’e hatuur ekipa Academica Fc okupa provizoriu iha tabela klasifikasaun Liga Timorense primeira divizaun ho pontus 4
Jogu entre ekipa rua ne’e hala’o iha Estadion Munisipal Dili kinta (02/03). Iha inisiu jogu primeira parte ekipa rua iha ambisaun aas hodi buka oportunidade atu hatama golu liu hosi kontra atake ba malu.
Maibe ekipa Academica Fc ne’ebe mak hatudu ritmu jogu ho diak konsege domina bola hodi lansa suta fila fila ba rede Aitana Fc ne’ebe mak nia defeza ladun solidu maibe atake ne’ebe mak lansa hosi Academica seidauk bele kona iha tarjetu.
Enkuantu ekipa Aitana Fc la nonok deit maibe Aitana mos konsege lansa suta fila fila ba ekipa Academica Fc maibe guarda no defensivu hosi Academica Fc nafatin solidu hodi la fo fatin ba ekipa Aitana Fc hodi produs golu ho nune’e to’o termina jogu primeira parte score mantein 0-0.
Kontinua ba jogu segunda parte ekipa rua ne’e mantein lansa kontra atake ba malu ho ritmu jogu ne’ebe makaas hodi buka oportunidade atu bele produs golu.
Maibe ekipa Academica Fc ne’ebe mak hatudu liu ritmu jogu konsege domina bola hodi lansa suta fila fila ho nune’e tama ba iha minutu 70 Academica Fc konsege produs golu ida liu hosi jogador Juvinal Boavida hodi muda kedas score ba 1-0.
Kapitaun da ekipa ne’e produs golu hafoin hetan bola muta iha area grandeal laran.
Ho golu ne’e halo ekipa Academica Fc kontinua fo presaun makas ho nune’e liu deit minutu 3 Academica Fc marka tan golu ida liu hosi jogador Hilario Ximenes
Futebolista ho numeru kamizola 11 ne’e marka golu hafoin simu assitensia bola pasagen hosi nia kompatriota iha parte karuk hafoin fura rede Aitana Fc hodi muda aumenta score ba 2-0.
Ho golu ne’e jogu sa’i manas liu tan ba ekipa rua ne’e maibe linha defensivu hosi Aitana Fc ne’ebe mak ladun solidu halo sira tenke sofre tan golu terseiru hafoin jogador Helder Lopes susesu fura rede Aitana Fc.
Jogador ho numeru kamizola 17 ne’e marka golu hafoin hatudu nia asaun hodi marka golu no muda aumenta hikas score ba 3-0.
Ho score refere intensidade jogu sa’i manas liu tan ba ekipa rua ne’e maibe la iha tan golu ruma mak akontese to’o termina jogu segunda parte vitoria ba Academica Fc ho score 3-0.
Hosi rezultadu vitoria ne’e lori ekipa Academica Fc ukun provizoriu iha tabela klasifikasaun provizoriu primeira divizaun Liga Timorense ho pontus 4 hosi jogu rua manan ida no empata ida.
Enkuantu ekipa Aitana Fc tun ba pozisaun 5 ho pontus tolu (3) hosi jogu rua manan ida no derota ida.
Alsino Da Costa
