DILI — Assalam Fc lidera provizoriu tabela klasifikasaun primeira divizaun Liga Timorense, hafoin halakon As Ponta Leste ho score 2-0.
Jogu jornada daruak Liga Timorense entre ekipa Assalam Fc kontra As Ponta Leste ne’e hala’o iha Estadion Munisipal Dili sexta (03/03).
Iha inisiu jogu primeira parte ekipa rua ne’e hala’o kedas jogu ho ritmu ne’ebe mak aas hodi lansa kontra atake ba malu ho tekniku no tatiku ne’ebe mak sira iha.
Maibe ekipa Assalam Fc ne’ebe mak haforsa ho jogador estranjeiru nain 3 desde inisiu jogu konsege domina liu bola hodi lansa suta fila fila ba rede As Ponta Leste maibe sei bele antisipa hosi guarda defensivu hosi As Ponta Leste.
Enkuantu ekipa Ponta Leste ne’ebe mak hatudu ritmu jogu ne’ebe mak naton konsege hetan oportunidade hodi lansa suta ameasa ba rede Assalam maibe guarda no defeza mantein solidu hodi la fo fatin ba AS Ponta Leste hodi produs golu nune’e to’o termina jogu primeira parte score mantein 0-0.
Kontinua ba jogu segunda parte intensidade jogu sa’i manas liu tan ba ekipa rua ne’e hodi lansa kontra atake ba malu ho nune’e tama ba iha minutu 47 sorte diak monu liu ba ekipa Assalam Fc hodi produs golu dahuluk liu hosi jogador Lourenco Freitas hodi muda kedas score ba 1-0.
Eis jogador Lalenok United ne’e marka golu hafoin simu assitensia bola kruza hosi nia kompatriota hosi parte iskerda hodi fura kedas rede As Ponta Leste hodi muda score ba 1-0.
Ho score refere intensidade jogu komesa sa’i manas liu tan ho nune’e tama ba iha minutu 63 ekipa ne’e hotu hotu tenke hamenus jogador ida-ida hafoin hetan kartaun mean.
Hosi ekipa Assalam Fc tenke lakon jogador estranjeiru Adika Godwin hafoin simu kartaun kinor ba daruak.
Enkuantu ekipa As Ponta Leste tenke lakon jogador Joao Halle hafoin hetan kartaun kinor ba daruak tanba mosu dezentendementu ho jogador Adika Godwin.
Maske ekipa rua lakon jogador ida idak maibe ritmu jogu kontinua aas maibe ekipa Assalam Fc ne’ebe mak hatudu liu ritmu jogu konsege produs tan golu ida liu hosi jogador Hasan Costa.
Avansadu ho numeru kamizola 7 ne’e marka golu hafoin simu assitensia bola pasagen hosi nia kompatriota Elias Meskita iha linha klaran hodi fura kedas rede As Ponta Leste ba daruak nian ho nune’e muda aumenta tan score ba 2-0.
Score refere jogu sa’i manas liu tan ekipa As Ponta Leste ne’ebe mak sofre golu rua konsege domina hiakas bola hodi lansa suta fila fila ba ekipa Assalam Fc maibe guarda defensivu hosi assalam fc mantein solidu hodi la fo fatin ba AS Ponta Leste hodi produs golu ho nune’e to’o termina jogu segunda parte vitoria ba Assalam Fc ho score 2-0.
Hosi rezultadu vitoria ne’e lori ekipa Assalam Fc dudu tun ekipa Academica Fc hodi ukun provizoriu tabela klasifikasaun primeira divizaun Liga Timorense ho pontus 6 liu pontus rua ba Academica Fc ne’ebe mak iha pozisaun segundu ho pontus 4.
Enkuantu ekipa As Ponta Leste tenke tun ba pozisaun 7 ho pontus 1 hosi jogu rua empata ida no derota ida.
DVO
