DILI– AD SLB Laulara kontinua lidera tabela klasifikasaun primeira divizaun Liga Timorense, hafoin halakon nia adversariu Aitana Fc ho score 4-3.
Duelo entre ekipa rua ne’e hala’o iha Estadion Munisipal Dili, Domingu (02/04). Iha jogu ekipa rua ne’e hotu hotu hatudu jogu ne’ebe mak atrativu hodi atrai adeptus futebollovers ne’ebe mak asiste direta jogu refere iha stadion Munisipal Dili.
Maibe ekipa AD SLB ne’ebe mak hatudu ritmu jogu ho diak konsege domina liu bola ho nune’e jogu foin hala’o deit minutu 3 AD SLB lidera ona ho score 1-0 liu hosi asaun Alexandre Ima Kefy.
Futebolista ho numeru kamizola 21 ne’e fura rede Aitana Fc hafoin simu assitensia bola kruza hosi nia kompatriota Jerimias Batista.
Ho golu ne’e intensidade jogu komesa aas liu tan ho nune’e tama ba iha minutu 30 Aitana Fc konsege responde golu ida hodi halo balansu ba score sa’i 1-1 liu hosi kapitaun da ekipa Jilson dos Santos.
Jogador ho numeru kamizola 10 ne’e fura rede SLB liu hosi asaun kabesada hafoin simu assitensia bola kruza hosi nia kompaineru Rivaldo Martins.
Rezultadu empata ne’e la dura ho tempu naruk tanba liu deit minutu 6 AD SLB lidera hikas ho score 2-1 liu hosi jogador Jhon frith de Oliveira.
Ho score refere jogu kontinua manas liu tan ba ekipa rua ne’e maibe to’o termina jogu primeira parte la iha tan golu ruma mak akontese ho nune’e AD SLB mantein lidera ho score 2-1.
Kontinua ba jogu segunda parte intensidade jogu komesa aas liu tan tanba ekipa rua lansa inisiativa hodi halo peresaun ba malu no tama ba iha minutu 58 Aitana Fc konsege responde golu ida hodi halo balansu ba score sa’i 2-2 liu hosi jogador estranjeiru Mamadou Conde.
Ho score refere ekipa rua ne’e hasae liu tan ritmu jogu liu hosi substituisaun ba jogador hodi halo mudansa ba tatika no Tama ba iha minutu 75 Zenivio Mota susesu fura rede Aitana Fc hodi lori nia ekipa AD SLB lidera ho score 3-2.
Futebolista ho numeru kamizola 7 ne’e marka golu hafoin simu assitensia bola kruza hosi Jerimias Batista iha linha iskerda.
Liu deit minutu rua rede Aitana nakdoko hikas hafoin ekipa Aitana sentra hodi pasa bola sala no jogador Estrela Ad SLB Mouzinho Barreto de Lima aproveita erru ne’e hodi fura kedas rede Aitana Fc hodi hasae score ba 4-2.
Ho score refere jogu sa’i manas liu tan ba ekipa rua maibe Aitana Fc ne’ebe mak halo esforsu makas hodi responde golu ho nune’e tama ba iha minutu 87 ekipa Aitana Fc konsege hetan penalidade tanba akontese bola mao iha area grandeal AD SLB.
No jogador Mamadou Conde ne’ebe mak sai ezekutor ba penalidade refere susesu fura rede SLB ne’ebe mak hein hosi Andrew mensh hodi muda score ba 4-3.
Ho golu ne’e jogu sa’i manas liu tan ba ekipa rua maibe la iha tan golu ruma mak akontese to’o termina jogu segunda parte vitoria ba AD SLB Laulara ho score 4-3.
Hosi rezultadu vitoria ne’e hatuur ekipa AD SLB mantein ukun tabela klasifikasaun primeira divizaun Liga Timorense ho pontus 14 hosi jogu dala neen sein derota manan dala haat no empata dala rua.
Enkuantu ekipa Aitana Fc mantein iha pozisaun ikus ho pontus 4 hosi jogu dala lima manan dala ida empata dala ida no derota dala tolu.
DVO
