Dili — Fc Porto Taibesse tenke fahe pontus ho nia adversariu Atletico Ultramar/Coração hafoin empata ho score 0-0, iha jogu kontinuasaun primeira divizaun Liga Timorense ne’ebe mak hala’o iha Estadion Munisipal Dili (04/04/2023).
Iha inisiu jogu primeira parte ekipa rua tun kedas ho ambisaun aas hodi lansa kontra atake ba malu liu hosi tekniku no tatiku ida idak nian maibe ekipa Fc Porto Taibesse ne’ebe mak hala’o jogu ho ofensivu hodi lansa suta fila fila ba rede Atletico ultramar Coração Fc maibe guarda no defensivu hosi armada Coracao la fo fatin ba ekipa Fc Porto Taibesse hodi marka golu ho nune’e to’o termina jogu primeira parte score mantein okulista 0-0.
Kontinua ba jogu segunda parte intensidade jogu komesa makaas liu tan, ba ekipa rua ne’e hodi lansa kontra atake ba malu.
Ekipa Fc Portu Taibesse ne’ebe mak hatudu ritmu jogu furak liu hosi tatiku ain ba ain konsege domina liu bola hodi lansa suta fila fila ba rede Atletico Ultramar Coracao maibe seidauk bele rezulta golu.
Enkuantu ekipa Ultramar Coracao ne’ebe mak hatudu jogu ofensivu konsege hetan oportunidade balu liu hosi kaunter atake ba rede Fc Porto Taibesse maibe defeza hosi Porto Taibesse mantein solidu.
Fc Portu Taibesse komesa hatudu sira nia ritmu jogu hodi lansa presaun makas ho nune’e tama ba iha minutu 79 Fc Porto Taibesse konsege hetan oportunidade osan mean hafoin defeza hosi Atletico Ultramar/ Coracao komete erru iha area grandeal ho nune’e arbitu deside fo penalidade ba ekipa Portu Taibesse.
Jogador estranjeiru Yohanes Jehaman nuudar mos avansadu prinsipal Fc Portu Taibesse ne’e falla hodi ezekuta penaltu tanba sei bele antisipa hosi guarda rede.
Ho falla penaltu refere halo euforia adeptus sira haklalak hodi fo nafatin sira nia apoiu ba sira nia ekipa favoritu rua ne’e maske nune’e to’o termina jogu segunda parte score mantein okulista 0-0.
Hosi rezultadu empata ne’e hatuur ekipa Fc Porto Taibesse iha pozisaun 4 ho pontus 8 hosi jogu dala 6 manan dala rua empata dala rua no derota dala rua.
Enkuantu ekipa Ultramar Coracao Fc okupa iha pozisaun 7 ho pontus 5 hosi jogu dala 5 manan dala ida empata dala rua no derota dala rua
DVO
