DILI — DIT Fc lidera hikas tabela klasifikasaun Liga Timorense segunda divizaun hafoin halakon nia adversariu Kablaki Fc ho score 5-1 iha jogu kontinuasaun jornada da-lima ne’ebe mak hala’o iha Estadion Munisipal Dili, Domingu(09/04).
Iha inisiu jogu ekipa rua hala’o jogu ho ritmu ne’ebe kalma hodi lansa kontra atake ba malu no Tama ba iha minutu 12 guarda rede Kablaki Januario Aby halo blunder no Elvis Silva aproveita hodi pres hodi fura kedas rede Kablaki Fc hodi hatuur score ba 1-0.
Liu deit minutu minutu ida rede Kablaki Fc tenke nakdoko hikas liu hosi asaun Bonaventura Klau hodi haboot score ba 2-0.
Ho score refere hasae liu tan intensidade jogu maibe to’o termina jogu primeira parte DIT Fc mantein lidera ho score 2-0.
Kontinua ba jogu segunda parte intensidade jogu komesa manas liu tan no tama ba iha minutu 48 Kablaki Fc tenke hala’o jogu ho jogador nain 10 hafoin Jorge Alves hetan kartaun mean.
Menus jogador ida DIT Fc domina liu tan jogu ho nune’e tama ba iha minutu 59 DIT Fc haboot liu tan score ba 3-0 liu hosi asaun Rui Da Costa.
Liu deit minutu haat ka iha minutu 63 Kapitaun ekipa DIT Fc Jose dos Santos hamorin nia naran hodi hasae score ba 4-0.
Maske hala’o jogu ho jogador nain 10 maibe la hamate espiritu kompetetivu hosi Kablaki Fc ho nune’e tama ba iha minutu 81 Kablaki Fc konsege responde golu ida hodi muda score sa’i 4-1.
Maibe liu deit minutu rua DIT Fc haboot liu tan score sa’i 5-1 liu hosi jogador Elvis da Costa hodi termina jogu segunda parte vitoria ba DIT Fc.
Hosi rezultadu vitoria ne’e lori ekipa DIT Fc dudu ses As Marca hosi premeru tabela klasifikasaun hodi ukun hikas tabela klasifikasaun Liga Timorense Segunda divizaun ho pontus 13 hosi jogu dala 5 manan dala 4 no empata dala ida.
DVO
