DILI– Fitun Estudante Lorosae Fc ho Santa Cruz Fc, obrigadu tenke fahe pontus hafoin ekipa rua hatudu forsa hanesan hodi empata ho score 1-1, iha jogu kontinuasaun Liga Timorense Segunda divizaun mak hala’o iha Estadion Munisipal Dili, Segunda,(10/04).
Hanesan babain iha inisiu jogu ekipa rua tun ho tekniku no tatiku ida idak hodi lansa kontra atake ba malu, maibe ekipa Santa Cruz ne’ebe mak hatudu ritmu jogu ho diak konsege domina liu bola hodi lansa suta fila fila ba rede Adversariu Fiel Fc maibe guarda defensivu hosi Fiel Fc mantein linha metin hodi la fo fatin ba ekipa Santa Cruz Fc hodi produs golu.
Enkuantu ekipa Fiel Fc ne’ebe mak hatudu ritmu jogu ho naton konsege fura uluk rede Santa Cruz Fc liu hosi asaun individual Joao Ximenes iha minutu 42 hodi muda score sa’i 1-0.
Ho score refere jogu sa’i manas liu tan ba ekipa rua ne’e hodi lansa presaun ba malu maibe ekipa rua ne’e hotu hotu iha linha defensivu diak hi nune’e to’o termina jogu primeira parte ekipa Fiel Fc mantein lidera ho score 1-0.
Kontinua ba jogu segunda parte intensidade jogu komesa manas liu tan maibe ekipa Santa Cruz Fc ne’ebe mak sofre uluk golu desde primeira parte tenta hodi halo mudansa ba tatika liu hosi substituisaun ba jogador sira no mudansa refere konsege fo rezultadu pozitivu ho nune’e tama ba iha minutu 54 Santa Cruz Fc konsege responde golu ida hodi halo balansu ba score sa’i 1-1 liu hosi asaun Arsenio Amaral.
Ho sore refere halo jogu komesa manas liu tan ba ekipa rua ne’e hodi lansa kontra atake ba malu maibe defeza hosi kada ekipa mantein solidu ho nune’e to’o termina jogu segunda parte score mantein 1-1.
Ho rezultadu empata ne’e obriga ekipa rua tenke faila ho pontus ida hotu aumenta pontus ida ne’e lori ekipa Fiel ba okupa iha kuartu klasifikasaun provizoriu Liga Timorense Segunda divizaun ho pontus 5 hosi jogu dala 5 manan ida empata rua no derota dala rua.
Enkuantu ekipa Santa Cruz Fc okupa iha pozisaun da-neen ho pontus 4 hosi jogu dala lima manan dala ida empata dala ida no derota dala tolu.
DVO
