DILI — Karketu Dili Fc susesu rekolla pontus tolu hafoin halakon nia adversariu Academica Fc ho score 2-1, rezultadu vitoria ne’e fo esperansa boot ba armada matak malirin hodi repete memoria murak Liga Timorense epoka 2021.
Duelo entre ekipa rua ne’e hala’o iha Estadion Munisipal Dili, Kuarta (12/04/2023), ekipa hahu hala’o jogu ho agresivu desde inisiu jogu primeira parte hodi lansa kontra atake ba malu liu hosi tekniku no tatiku ida idak nian.
Maibe armada matak malirin ne’ebe mak domina liu bola konsege lansa suta fila fila ba rede Academica Fc maibe guarda defensivu hosi Academica Fc mantein solidu hodi la fo fatin ba Karketu Dili Fc hodi produs golu ho nune’e to’o termina jogu primeira parte score mantein okulista 0-0.
Kontinua ba jogu segunda parte ekipa rua ne’e hasae liu intensidade jogu liu hosi kontra atake ba malu ho nune’e tama ba iha minutu 51 Agosto da Costa susesu lori nia ekipa Karketu Dili Fc lidera ho score 1-0.
Avansadu ho numeru kamizola 80 ne’e marka golu liu hosi asaun individual hodi sobu defeza Academica Fc hafoin fura rede Academica Fc.
Ho score refere jogu sa’i manas liu tan ba ekipa rua no tama ba iha minutu 64 Karketu Dili Fc haboot liu tan score ba 2-0 liu hosi jogador Gaudencio Monteiro.
Sofre uluk golu rua la hamate espiritu kompetetivu hosi Academica Fc hodi nafatin lansa presaun ba Karketu Dili Fc ho nune’e tama ba iha minutu 77 Academica Fc konsege produs golu ida hodi hamihis score ba 2-1 liu hosi jogador Lexi Atok.
Futebolista ho numeru kamizola 26 ne’e marka golu liu hosi suta livre no guarda rede la konsege antisipa ho nune’e bola tama direita ba rede laran.
Ho score refere jogu sa’i manas liu tan ba ekipa rua Maibe ekipa Academica Fc ne’ebe mak tenta nafatin hodi produs golu maibe defeza hosi Karketu Dili Fc mantein linha metin ho nune’e to’o termina jogu segunda parte vitoria ba Karketu Dili Fc ho score 2-1.
Hosi rezultadu vitoria ne’e lori ekipa Karketu Dili Fc okupa iha terseiru klasifikasaun provizoriu Liga Timorense priemeira divizaun ho pontus 9 hosi jogu dala lima manan dala tolu no derota dala rua.
Enkuantu ekipa Academica Fc mantein iha pozisaun 8 ho pontus lima hosi jogu dala hitu manan dala ida empata dala rua no derota dala haat.
Entertantu iha pozisaun dahuluk okupa hela hosi AD SLB ho pontus 14 hosi jogu dala 6 manan dala haat no empata dala rua.
DVO
