DILI– Atletico Ultramar/Coração Fc susesu rekoila pontus tolu hafoin halakon nia adversariu Aitana Fc ho score mihis 1-0. Golu Vitoria hosi Coração Fc ne’e produs hosi Rufino Gama.
Jogu entre ekipa rua ne’e hala’o iha Estadion Munisipal Dili kinta, (13/04/2023), iha inisiu jogu ekipa rua hotu hotu hatudu jogu diak hodi lansa kontra atake ba malu tanba ekipa rua iha ambisaun aas hodi sa’i hosi jona degrada no tama ba iha minutu 9 Avansadu Ateltico Ultramar/Coração Fc, Rofino Gama fura rede Aitana Fc hodi muda score sa’i 1-0.
Futebolista ho numeru kamizola 14, ne’e fura rede Aitana Fc hafoin hatudu nia asaun individual hodi suta dook no guarda rede Aitana Fc Celestino da Costa la konsege salva ho nune’e bola tama direta ba rede laran.
Ho golu ne’e jogu komesa manas liu tan ba ekipa rua ne’e hodi lansa kontra atake ba malu maibe guarda defensivu hosi kada ekipa mantein linha metin hodi la fo fatin ba avansadu sira hodi produs golu ho nune’e to’o termina jogu primeira parte ekipa Atletico Ultrama/Coração Fc mantein lidera ho score 1-0.
Kontinua ba jogu segunda parte ekipa rua ne’e hasae liu tan intensidade jogu hodi lansa kontra atake ba malu liu hosi Mudansa ba tatika.
Maibe ekipa Atletico Ultramar/Coração ne’ebe lidera uluk ho score 1-0 hala’o jogu ofensivu hodi hein halo kaunter atake.
Enkuantu ekipa Aitana Fc ne’ebe mak hatudu ritmu jogu hodi tenta nafatin atu sobu defeza hosi Atletico Ultramar maibe guarda defensivu hosi Ultramar la fo fatin ho nune’e to’o termina jogu segunda parte vitoria ba Atletico Ultramar/CoraçãoFc ho score mihis 1-0.
Hosi rezultadu vitoria ne’e hatuur ekipa Atletico Ultramar/Coração Fc, iha pozisaun 6 ho pontus 8 hosi jogu dala neen manan dala rua empata dala rua no derota dala rua.
Enkuantu ekipa Aitana Fc kontinua terus iha jona mean ho Pontus 4 hosi jogu dala 6 manan dala ida empata dala ida no derota dala haat.
DVO
