DIL I — AD SLB Laulara susesu rekoila pontus tolu hafoin halakon nia adversariu As Ponta Leste ho score mihis 1-0 iha jogu kontinuasaun Liga Timorense jornada da-hitu, rezultadu vitoria lori armada Makikit Laulara ukun ho pontus 17, no persija deit pontus ida hodi sa’i kampeaun ba Liga Timorense epoka 2022-2023.
Jogu ne’ebe mak hala’o iha Estadion Munisipal Dili, sabadu (15/04/2023), ne’e ekipa rua tun kedas ambisaun aas hodi lansa kontra atake ba malu hodi buka pontus tolu atu asegura pozisaun.
Ekipa AD SLB ne’ebe mak dadaun ne’e ukun hela tabela klasifikasaun primeira divizaun Liga Timorense no kandidatu forte hodi sa’i kampeaun ba Liga Timorense ne’e hala’o jogu agresivu tebes.
Maibe ekipa As Ponta Leste ne’ebe mak sei iha oportunidade hodi bele hadau titulu kampeaun Liga Timorense ne’e konsege fo presaun makas ba AD SLB maibe to’o termina jogu primeira parte score mantein okulista 0-0.
Kontinua ba jogu segunda parte intensidade jogu komesa manas liu tan ba ekipa rua ne’e hodi lansa kontra atake ba malu
No tama ba iha minutu 61 SLB hahu halo mudansa ba tatika liu hosi substituisaun ba jogador hodi hasai Michel Hutambart no hatama Alexandro Ima Kefy.
Maske nune’e ekipa As Ponta Leste kontinua domina liu bola hodi lansa presaun makas ba SLB.
No tama ba iha minutu 75 AD SLB Kontinua halo substituisaun ba jogador hodi hasai Kornelis Portela no hatama hikas avansadu Alexandro Lemos hodi halo mudansa ba tatika no mudansa refere konsege fo rezultadu pozitivu hafoin tama ba iha minutu 80 Mouzinho Barreto de Lima susesu fura rede As Ponta Leste hodi lori nia ekipa AD SLB lidera ho score 1-0.
Ho score refere jogu sa’i manas liu tan ba ekipa rua ne’e hodi lansa presaun ba malu no tama ba iha minutu 86 As Ponta Leste tenke lakon jogador Revelino Martins hafoin hetan kartaun mean.
Menus jogador ida SLB tenta nafatin hodi hao presaun makas ba As Ponta Leste maibe to’o termina jogu segunda parte score mantein 1-0 vitoria ba AD SLB.
Hosi rezultadu vitoria ne’e hatuur metin ekipa Ad SLB iha pozisaun dahuluk Liga Timorense epoka 2022-2023, ho Pontus 17 hosi jogu dala 7 manan dala 5 empata dala 2. Enkuantu rezultadu vitoria hosi ekipa AD SLB ne’e mos hakoi ona mehi As Ponta Leste no Emmanuel Fc hodi hadau titulu kampeaun.
Enkuantu klubu ne’ebe mak se’i iha esperansa hodi hadau titulu kampeaun husi SLB maka klubu Karketu Dili Fc ne’ebe mak dadaun ne’e iha pozisaun 4 ho pontus 9 hosi jogu dala 5. Karketu obrigatoriu manan jogu tolu hasoru ; Assalam, SLB no Portu Taibesi. Ida ne’e mak unika dalan ba karketu hodi sai kampeaun.
DVO
