DILI– jogador Estrela Paulo Gally Freitas susesu marka golu rua hodi llori nia ekipa Karketu Dili Fc, rekolla pontus 3 hafoin halakon nia adversariu Assalam Fc ho score 2-1. Vitoria ne’e fo esperansa ba Armada Matak malirin hodi repete memoria murak Liga Timorense 2021.
Duel entre ekipa rua ne’e hala’o iha Estadion Munisipal Dili, Domingu,(16/04/2023). Iha inisiu jogu kick off primeira parte ekipa rua hotu hotu tun ho ambisaun aas hodi lansa kontra atake ba malu maibe iha inisiu jogu ekipa Assalam Fc ne’ebe mak domina liu bola konsege lansa suta fila fila ba rede Karketu Dili Fc ho nune’e tama ba iha minutu 25 ekipa Assalam Fc konsege lidera uluk ho score 1-0 liu hosi asaun Martinho Belo.
Futebolista ho numeru kamizola 33 nee fura rede Karketu Dili Fc hafoin simu assitensia bola pasagen hosi nia kompatriota iha linha klaran.
Ho Golu ne’e jogu sa’i manas liu tan ba ekipa maibe ekipa Karketu Dili Fc ne’ebe mak sofre uluk golu ida konsege domina fila fali jogu ho nune’e tama ba iha minutu 37 armada matak malirin konsege responde golu ida hodi halo balansu ba score sa’i 1-1 liu hosi asaun Paulo Gally Freitas.
Ho Score refere jogu sa’i manas liu tan maibe to’o termina jogu primeira parte score mantein 1-1.
Kontinua ba jogu segunda parte ekipa rua mantein lansa kontra atake ba malu ho intensidade ne’ebe mak aas maibe ekipa Karketu Dili Fc ne’ebe mak ho ambisaun aas konsege domina liu bola ho nune’e tama ba iha minutu 63 Paulo Gally konsege lori Karketu Dili Fc konsege lidera ho score 2-1.
Jogador estrela timoroan ne’e marka golu liu hosi asaun suta livre no guarda rede Assalam Fc la konsege antisipa no bola tama direita.
Ho Score refere jogu sa’i manas liu tan ba ekipa rua maibe ekipa Assalam Fc konsege domina liu bola hodi lansa suta fila fila maibe ekipa Karketu Dili Fc ne’ebe mak lidera ona mantein linha metin hodi la fo fatin ba ekipa Assalam Fc ho nune’e to’o termina jogu segunda parte score mantein 2-1. Vitoria ba Karketu Dili Fc.
Hosi rezultadu vitoria ne’e fo esperansa boot armada matak malirin hodi repete hikas memoria murak kampeaun Liga Timorense epoka 2021.
Vitoria ne’e lori ekipa Karketu Dili Fc sae ba pozisaun 3 ho pontus 12 hosi jogu dala 6 manan dala haat derota dala rua.
Enkuantu iha pozisaun dahuluk okupa hosi AD SLB ho pontus 17 hosi jogu dala 7 manan dala lima no empata dala rua.
DVO
