DILI– Sekretariu jeral klubu Karketu Dili Fc Elizeu Isac hatete, Karketu Dili Fc nunka rekonese ekipa AD SLB Laulara hanesan ekipa zigante. No konfiante Matak malirin sei manan Makikit Laulara iha jogu kontinuasaun Liga Timorense semana da-neen ne’ebe mak sei hala’o iha Stadion Munisipal Dili Sexta (21/04/2021).
Kompetisaun Liga Timorense priemeira divizaun epoka 2022-2023, besik to’o ona nia rohan iha ne’ebe ekipa AD SLB Laulara nuudar ekipa favoritu hodi sa’i kampeaun ba Liga Timorense temporada ne’e tanba rekolla ona pontus 17 hosi jogu dala 7 ne’ebe mak hala’o ona ne’e persija deit ona pontus ida hodi bele sa’i kampeaun.
Maske nune’e laos fasil tanba klubu Karketu Dili Fc sai hanesan ameasadu boot hodi hadau titulu kampeaun hosi klubu istimadu ho naran Makikit Laulara ne’e
Kampeaun Liga Timorense epoka 2021, sofre derota iha jogu rua primeiru, maibe komesa hetan fila fali ona sira nia ritmu jogu no konsege manan iha jogu haat ikus ne’e no dadaun ne’e okupa hela iha terseiru klasifikasaun provizoriu Liga Timorense.
Iha entervista ho JHD, Sekretariu jeral klubu Karketu Dili Fc Elizeu Isac, hatete, jogador iha kondisaun diak hotu maibe menus jogador ida, kartaun nain ida mak nia maka Gaudencio monteiro, maibe ekipa tekniku iha ona jogador ne’ebe eskolidu hodi subtitui jogador refere.
“Karketu nia objektivu tuir kompetisaun para juara ami rejistu 28 pesoas nune’e ida aleija ou akumula ami iha seluk hodi troka tamba kualidade hanesan deit” nia haktuir ba JHD kinta (20/04).
“Karketu nunca rekonhese Slb equipa zigante Jogo aban tengki manan” nia hatutan.
Nia dehan, Karketu depois lakon jogu rua iha inisiu Karketu kontinua kedan ho moto katak misaun sapu rata jogu ikus tengki hodi nune’e rekolla pontus 18 iha fim de kompetisaun.
Sekretariu jeral klubu Karketu Dili Fc, ne’e mos fiar aan hodi fo nia prediksaun katak iha jogu kontra SLB ne’e Karketu sei manan ho score 3-1.
JHD