Dili– Orgaun Liga Futebol Timor-Leste (LFTL) fo sansaun ba klubu priemeira divizaun AD SLB Laulara komesa hosi derota WO (Walk Out) 5-0, hamenus pontus tolu (3), no multa ho koima 1000 USD .
Makikit Laulara hetan sansaun hirak ne’e hafoin la partisipa iha jogu jornada 7 nuudar jogu desizivu kontra Karketu Dili Fc ne’ebe tuir orariu atu realiza iha loron (21/04). iha kompetisaun Liga Timorense temporada ne’e.
LFTL fo sansaun ba AD SLB Laulara ne’e bazeia ba artigu 13 kompetisaun sura pontu alinea 4 iha regulamentu ba kompetisaun Liga Timorense ne’ebe sira tetu no análiza no konsultasaun ba Komisaun etika dixiplina FFTL liu husi konsellu judisional Liga Timorense foti desizaun final ezekutivu Liga Timorense nian la iha intervensaun husi parte datoluk ida ne’e justu no parsial no tane sas prinsipiu Fair play no lei jogu nian.
“Ami husi LFTL foti ona desizaun final ba AD SLB Laulara ne’ebe la marka prezensa iha Estadion Munisipal Dili iha loron 21 fulan abril 2023 kontra Karketu Dili FC mak AD SLB Laulara hetan derrota ho rezultadu WO ho score 5-0, hamenus pontu 3 husi pontu 17 ba pontu 14 no atribui sansaun koima ba AD SLB Laulara orsamentu montante 1000 USD”dehan koordenador jeral LFTL Octavio da Conceicão ba jornalista sira liu konferensia imprensa iha Estadion Munisipal Dili Kinta (27/04/023).
Nia dehan AD SLB Laulara la degrada ba segundu divizaun Liga Timorense ba epoka tuir mai tanba kestaun AD SLB Laulara nian ne’e diferente ho klube sira antes ne’e orgaun LFTL fo degradasaun ba klube sira.
Hosi sansaun ne’ebe mak LFTL Fo ba ekipa AD SLB ne’e dudu tun AD SLB ba iha pozisaun daruak no Armada matak malirin okupa hikas iha primeru klasifikasaun provizoriu Liga Timorense ho pontus 15 hosi jogu dala 7 manan dala lima no derota dala rua.
Ho nune’e jogu rua ikus husi Karketu Dili FC kontra Porto Taibesse FC no Emmanuel FC kontra Aitana FC mak sei determina tanba ekipa rua iha oportunidade hotu tanba Karketu Dili FC daudaun iha pontu 15 no Emmanuel FC ho pontu 12 iha tabela klasifikasaun priemeira divizaun Liga Timorense epoka ne’e.
JHD
