DILI– Treinador foun selsaun nasional Timor Leste Park Song Tae, ne’ebe mak eskolidu hosi Federasaun Futebol Timor-Leste (FFTL) hodi lidera ekipa selsaun falla hodi hetan pontus iha debut hamutuk ekipa Lafaek nurak sub-22 hafoin derota ho score 4-0 kontra Cambodia.
Jogu entre Lafaek nurak sub-22 kontra Kambodia ne’e hala’o iha Stadion Olympic, Phnom Penh, sabadu (29/04), iha jogu dahuluk faze grupu (A) Sea Games 2023 ne’e nuudar mos debut dahuluk ba Treinador selsaun nasional Timor Leste Park Song Tae. iha debut dahuluk treinador ho nasionalidade Kore ne’e falla hodi hetan pontus no tenke simu realidade moruk hodi simu rezultadu derota ho score 4-0.
Desde inisiu jogu ekipa rua ne’e hala’o kontra atake ba malu ekipa Lafaek konsege hetan oportunidade berliante hodi produs golu liu hosi asaun Kornelis Portela hafoin hadau bola hosi defeza Cambodia maibe la konsege aproveita ho diak nune’e la rezulta golu.
Tama ba iha minutu 38 Cambodia hahu fera rede Timor Leste liu hosi asaun Chou Sinti hodi muda score ba 1-0.
Ho golu ne’e obriga ekipa Lafaek tenke hala’o jogu ho nakloke ho nune’e tama ba iha minutu 45 antes atu termina jogu primeira parte Chou Sinti fura tan rede ekipa Lafaek dala ida tan hodi hasae score ba 2-0.
Kontinua ba jogu segunda parte tensi jogu hahu Aas hodi lansa kontra atake ba malu no tama ba iha minutu 73 Sor Rotana Bomba tan rede Timor Leste hodi hasae score ba 3-0.
Kambodia haboot liu tan score ba 4-0 liu hosi asaun Lim pisoth hafoin aproveita assitensia hosi nia kompatriota Sor Rotana ho score refere mantein to’o termina jogu segunda parte vitoria ba Kambodia.
Hosi rezultadu vitoria ne’e lori ekipa Uma nain Kambodia ukun provizoriu tabela klasifikasaun pool (A) ho pontus 3
Enkuantu Timor Leste iha pozisaun ikus liu ho pontus 0 hosi jogu dala ida no sofre derota ho score 4-0
Rekorda fali katak antes ne’e ekipa Lafaek sei komanda hosi Treinador Fabio Maciel susesu halakon Kambodia ho score 1-0 iha jogu Futebol sudeste aziatiku (AFF sigla ingles) iha faze grupu no rezultadu vitoria ne’e lori ekipa selsaun nasional ba semi final.
JHD
