DILI– Kompetisaun Liga Timorense epoka 2022-2023 ofisialmente termina ona no jogador prinsipal Emmanuel Fc Edit Savio sa’i mellor markador ho golu hamutuk 7.
Eis jogador Boavista Fc no Aitana Fc ne’e sa’i mellor markador hafoin produs tan golu rua hodi lori nia ekipa Emmanuel Fc halakon Adversariu Aitana Fc ho score fantastiku 8-2 iha jornada ikus Liga Timorense ne’ebe mak hala’o iha Estadion Munisipal Dili domingu (30/04).
Ho mellor markador ne’e Edit Savio hetan premiu osan ho montante dolar 500 USD.
Ba jornalista sira Edit Savio espresa sentimentu kontente tanba bele sa’i mellor markador ba kompetisaun Liga Timorense epoka 2022-2023.
“Ohin loron orgullu los tanba ha’u bele foti top score Liga Timorense 2023 ne’e tanba husi kopa 12 novembru 2015, hau sei ho idade neebe kiik no sempre kompete ho estranjeiru no kandidata forte sai melhor markador maibe too final sempre failha hela deit” esperesa jogador ne’e hodi haktuir nia istoria luta nuudar jogador produtivu.
Nia afirma, maske sempre okupa iha pozisaun daruak konba mellor markador maibe la hamate espiritu kompetetivu hodi kompete Nafatin.
“Hau la patah semangat hau nafatin esforsu aan too mai iha 2023 hau ho idade neebe mak avansa ba bebeik maibe hau nafatin iha vontade neebe tinan ida nee foti duni top score para neebe iha hau sente satisfaz iha ha’u Nia kareira futebol” dehan nia.
Nia hatutan, ba futuru maske ho idade ne’ebe mak la produtivu ona maibe sei nafatin esforsu hodi bele kompete ho jogador foin sae Sira.
“Mellor markador ida ne’e ha’u oferese ba ha’u nia maluk sira no mos ba ha’u nia alin (Fifi Savio) ne’ebe ha’u mai troka nia fatin” dehan Nia.
Nia explika, lolos epoka ne’e nia para hodi joga ona maibe tan Nia alin matebian Fifi Savio nia promete hakarak joga iha emmanuel Fc.
“Haforsa Emmanuel hakarak ka lakohi ha’u tenke esforsu ha’u Nia Aan para ha’u nia alin (matebian Fifi Savio) iha leten nia haree nia sente kontente” nia hakotu.
Kompetisaun liga Timorense ba temporada ne’e rasik hala’o deit ho metade de kompetisaun no Klubu primeira divizaun hamutuk 9 Mak kompete no Karketu Dili Fc mak sa’i kampeaun ba Liga Timorense epoka ne’e.
Klubu 9 ne’ebe mak kompete iha jogu primeira divizaun ne’e mak hanesan Karketu Dili Fc, Emmanuel Fc, AD SLB, AS Ponta Leste, Assalam Fc, Ateltico Ultramar/Coracao Fc, Fc Portu Taibesse, Academica Fc, no Aitana Fc.
JHD
